Иордания қироличаси Рания ал-Абдулла кийинишда алоҳида эътибор берадиган 7 жиҳат (фото)

Иордания қироличаси Рания ал-Абдулланинг кийиниш услуби аёлларга хос латофатли ва шу билан бирга замонавийлиги билан эътироф этиб келинади. Қиролича кийинишида ўзига хос 7 жиҳат мавжуд бўлиб, Cosmopolitan нашри улар нимадан иборатлигига эътибор қаратди.

Камар

Рания гардеробида ушбу аксессуарнинг турли ҳажм, шакл ва ранглисини учратса бў​лади. Камарни кўйлак, блузка, юбка ва бошқа либослар устидан мослаб кийишини кузатиш мумкин. Ушбу аксессуар билан қироличанинг қадди-қомати назокатли, бел қисми эса нозик кўринади.

Миллий либослар

Қиролича ҳамиша замонавий кўрингани билан миллий нақш ва принтлар туширилган либослар кийишни канда қилмайди. Бошқа биринчи хонимларга қараганда Рания образини сумкалар билан мукаммаллаштиришни ёқтиради. У U Fendi, Saint Laurent, Lanvin, Louis Vuitton  вa Bottega Veneta брендлари сумкаларини яхши кўради.

Елка қисми кенг либослар

Қиролича бундай услубда кийиниш орқали аёлларга хос латофатни яна бир бор ўзида акс эттиради. Асосан, елка қисми кенг бўлган кофталарни кийишни хуш кўради ва бундай кофта билан тўғри бичимли, қадди-қоматни акс эттирадиган юбка кийиб, кийиниш борасидаги мувозанатга риоя қилади.

Ўзига хос юбкалар

Ёрқин рангли, турли бичимдаги, принтлари ҳам бир-бирига ўхшамайдиган юбкалар Рания гардеробида қалашиб ётган бўлса не ажаб. У баъзида тиззадан сал пастда, баъзида эса товонни ёпадиган узунликдаги юбкаларда намоён бўлади. Юбкани блузка, топ ёки водолазкалар билан мослайди.

Бурма ҳошияли блузкалар

Қиролича классик услубдаги либослардан ташқари, ҳошияси бурма ёки бантли блузкалар кийишни ҳам хуш кўради. Бундай услубда, асосан, расмий учрашувларда кийинади.

Учли туфли

Иордания қироличаси 99% вазиятда учли туфли кияди. Унинг арсеналига назар ташланса, туфлилар коллекцияси бор эканига амин бўлиш мумкин. Оқ, мовий, қаймоқ ранг, қора принтли ва бошқа турли кўринишдаги мазкур туфлилар қироличанинг кийинишини янада жозибадор кўрсатади. Gianvito Rossi, Jimmy Choo вa Dior Раниянинг севимли брендлари ҳисобланади.

Аёлларга хос ранглар

Оч пушти ёки мовий рангдаги либослар билан қиролича янада мулойим кўринади. Умуман, кийиниш борасида у турли тенденцияларга амал қилади ва бир хилликдан қочади. Масалан, душанба куни ёрқин жимжимали пушти, сешанба куни жиддий услубдаги камарли, чоршанбада эса миллий либос кийиши мумкин.