Ўзбекистон ҳудудидаги туманларда карантин даврида автотранспорт воситалари ҳаракатига чеклов ўрнатилмаган, бироқ туман раҳбарлари томонидан карантин туфайли асосий йўлларда постлар ташкил этилган. Мазкур постлар тез тиббий ёрдам машиналари ҳаракатини чекламайди. Бу ҳақда Ички ишлар вазирлиги ахборот хизмати раҳбари Шоҳрух Ғиёсов маълум қилди.
Вазирлик вакилининг сўзларига кўра, мазкур постларда туман ҳудудига кираётган ҳамда туман ҳудудидан чиқаётган автотранспорт воситалари ҳайдовчиларидан қаердан келаётгани ва қаерга бораётгани сўралмоқда. Бу аҳоли хавфсизлигини таъминлаш мақсадида амалга оширилмоқда.
Шоҳрух Ғиёсов карантин даврида фуқароларнинг транспортда мақсадсиз ҳаракатланишини чеклаш мақсадида вилоятларнинг алоҳида ҳудудларида транспорт йўлларига тўсиқлар ҳам қўйилаётганини билдирди. Маълум қилинишича, тўсиқлар ўрнатилишида бирор маҳаллага транспортда кириш-чиқиш йўллари 6 ёки 7 та бўлса, улар тўсилади. Фавқулодда вазиятлар вазирлиги билан келишган ҳолда 2 та йўналиш қолдирилади ва улар назоратга олинади.
Ўрнатилган тўсиқларнинг барчаси ёнғин хавфсизлиги ҳамда тез тиббий ёрдам хизмати хариталарида аниқ белгилаб берилади. Шу сабабли тез тиббий ёрдам машиналарининг тўсиқларга учраш эҳтимоли камаяди. Қайд этилишича, тез тиббий ёрдам машиналарининг манзилга етиб бориш тезлиги олдингига қараганда ошган.
Таъкидланишича, ҳозиргача айрим вилоятларда фуқаролар томонидан йўлларга ўзбошимчалик билан ўрнатилган 46 тўсиқ аниқланган ва уларнинг барчаси олиб ташланган. Айни пайтда профилактика инспекторлари, ёнғин хавфсизлиги хизмати ходимлари аҳоли ўртасида тегишли тушунтириш ишларини олиб бормоқда.
Эслатиб ўтамиз, ички ишлар органлари йўл-патрул хизмати ходимлари томонидан карантин даврида автотранспорт воситасини махсус рухсатномасиз бошқарганлик учун транспорт воситаси жарима майдончасига жойлаштириш йўли билан ушлаб турилиши хабар қилинди. Шунингдек, 6 апрелдан бошлаб Тошкент шаҳрининг 11 та туманидаги 514 та маҳалла қошида карантин тартибини назорат қилувчи «Жамоатчилик назорати маскани» ташкил этилди.
Изоҳ (0)