Сирдарёда электр энергиясидан ноқонуний фойдаланиб, балиқчилик билан шуғулланган шахс жаримага тортилди

Сирдарё вилояти Мирзаобод туманида балиқчилик хўжалиги иш юритувчиси электр энергиясидан ноқонунуний фойдалангани сабабли давлатга етказилган зарарни тўлади. Бу ҳақда «Дарё»га Мажбурий ижро бюроси маълум қилди.

Хабар берилишича, МИБнинг Мирзаобод туман бўлими ходимлари томонидан «Ҳақиқат» МФЙ ҳудудида жойлашган балиқчилик фермер хўжалиги иш юритувчиси З.Й.нинг электр энергиясидан фойдаланиш ҳолати текширилган.

Текширувда аниқланишича, З.Й. ташқи таъсир кўрсатиш орқали ҳисоблагични сунъий равишда тўхтатган ҳамда уч дона ҳар бирининг қуввати 55 киловатт бўлган, сув тортишга мўлжалланган двигателлардан ноқонуний фойдаланиб келган. Мазкур ҳолат юзасидан балиқчилик фермер хўжалиги иш юритувчиси З.Й.га нисбатан тегишли ҳужжатлар расмийлаштирилган.

Туман электр тармоқлари корхонасининг қайта ҳисоб-китоб далолатномасига кўра, иш юритувчиси З.Й. томонидан электр тармоқлари корхонаси манфаатларига 120 миллион сўм миқдорида зарар етказилганлиги аниқланган.

Кўрилган чора-тадбирлар натижасида иш юритувчи З.Й. томонидан 120 миллион сўм пул маблағи банк кассасига нақд пул шаклда тўланган. Шунингдек, балиқчилик фермер хўжалигининг электр энергияси истеъмоли учун 35, 5 миллион сўм миқдорида қарздорлиги мавжудлиги аниқланган ҳамда етказилган зарарга қўшилган. Балиқчилик фермер хўжалиги томонидан электр таъминот корхонасига етказилган жами 155, 5 миллион сўмлик моддий зарар тўлиқ ундирилиши таъминланган.

Қайд этилишича, З.Й. етказилган моддий зарарнинг ўрнини белгиланган муддатда ихтиёрий равишда тўлиқ қоплаганлиги, айбига тўлиқ иқрорлиги, муқаддам судланмаганлиги, биринчи марта жиноят содир этганлиги, қилган ишидан пушаймонлиги сабабли жавобгарликдан озод этилган.

Аввалроқ Мажбурий ижро бюроси «Оҳангароншифер»нинг 146 нафар ходимига 388 миллион сўмлик иш ҳақини ундириб бергани ҳақида хабар берилган эди.