Ўзбекистондаги олий таълим муассасаларида инспектор лавозими жорий этилиш таклиф қилинди

Ички ишлар вазирлиги «Вояга етмаганлар ва ёшлар ўртасида ҳуқуқбузарликлар профилактикаси тизимини янада такомиллаштириш бўйича чора-тадбирлар тўғрисида»ги Президент қарори лойиҳасини муҳокамага қўйди.

Унга кўра Президент администрацияси ҳузуридаги Ёшлар ишлари агентлиги ҳузурида Ёшлар ўртасида ҳуқуқбузарликлар профилактикаси бўйича республика идоралараро ва Ёшлар ўртасида ҳуқуқбузарликлар профилактикаси бўйича ҳудудий идоралараро комиссиялари ташкил этилади.

Шунингдек, Ички ишлар вазирлиги Ҳуқуқбузарликлар профилактикаси бош бошқармаси ҳузурида Вояга етмаганлар ва ёшлар ўртасида ҳуқуқбузарликлар профилактикаси фаолиятини мувофиқлаштириш бошқармаси ташкил этилади.

Ички ишлар вазирлигининг қуйидаги:

• Қорақалпоғистон Республикаси Ички ишлар вазирлиги, Тошкент шаҳар ва вилояти ички ишлар бош бошқармалари, вилоятлар ички ишлар бошқармалари ҳуқуқбузарликлар профилактикаси бошқармаларининг Вояга етмаганлар ва ёшлар ўртасида ҳуқуқбузарликлар профилактикасини ташкил этиш бўлимлари (бўлинмалари, гуруҳлари)ни Вояга етмаганлар ва ёшлар ўртасида ҳуқуқбузарликлар профилактикасини ташкил этиш бўлимларига ўзгартириш;
• туман (шаҳар) ички ишлар органлари ҳуқуқбузарликлар профилактикаси бўлинмаларининг вояга етмаганлар ва ёшлар ўртасида ҳуқуқбузарликлар профилактикасини ташкил этиш гуруҳлари (бўлинмалари)ни Вояга етмаганлар ва ёшлар ўртасида ҳуқуқбузарликлар профилактикасини амалга ошириш гуруҳлари (бўлинмалари)га ўзгартириш тўғрисидаги таклифлари қабул қилиниши мумкин.

2020 йил 1 июлдан бошлаб юридик шахс ташкил этмаган ҳолда Ички ишлар вазирлиги ҳузурида Вояга етмаганлар ва ёшлар билан ишлаш тизимини ривожлантириш жамғармаси ташкил этилади ҳамда уни шакллантириш манбалари этиб қуйидагилар белгиланади:

• Ўзбекистон Ёшлар иттифоқининг ривожлантириш жамғармаси тушумларининг 10 фоизи;
• ички ишлар органлари ҳуқуқбузарликлар профилактикаси бўлинмалари томонидан аниқланган вояга етмаганлар ва уларнинг ота-оналари ёки уларининг ўрнини босувчи шахслар томонидан содир этилган маъмурий ҳуқуқбузарликларга доир ишлар бўйича ундирилган жарима маблағлари суммасининг 15 фоизи;
• халқаро молия институтлари ва бошқа хорижий донорларнинг грантлари ҳамда қонунчилик билан тақиқланмаган бошқа манбалар.

Ички ишлар вазирлиги ҳамда Олий ва ўрта махсус таълим вазирлигининг қуйидаги:

• олий таълим муассасаларида вояга етмаганлар ва ёшлар билан ишлаш бўйича инспектор лавозимини олий таълим муассасасининг бюджетдан ташқари маблағлари ҳисобидан жорий этиш;
• олий таълим муассасалари вояга етмаганлар ва ёшлар билан ишлаш бўйича инспекторларининг хизмат фаолияти бўйича тегишли олий таълим муассасаси билан бир вақтда ички ишлар органлари ҳуқуқбузарликлар профилактикаси бўлинмаларига ҳисобдорлигини белгилаш тўғрисидаги таклифлари қабул қилинади.

Ички ишлар вазирига жамғарма маблағлари ҳисобидан Ички ишлар вазирлиги Ҳуқуқбузарликлар профилактикаси бош бошқармасининг Вояга етмаганлар ва ёшлар ўртасида ҳуқуқбузарликлар профилактикаси фаолиятини мувофиқлаштириш бошқармаси ва унинг ҳудудий бўлинмалари ходимларининг қўшимча штат бирликларини жорий қилиш ҳамда ушбу соҳага фуқароларни шартнома асосида жалб қилиш ҳуқуқи берилади.

Бундан ташқари, маҳалла фуқаролар йиғинлари қошида таълим муассасалари психологлари раҳбарлигида жамоатчилик асосида фаолият кўрсатувчи «Психологик қўллаб-қувватлаш маркази» ташкил этилади.

Қуйидагилар марказнинг асосий вазифалари этиб белгиланади:

• маҳаллаларда таълим муассасалари ўқувчилари, уларнинг оила ва алоқадаги ижтимоий гуруҳлар аъзоларининг психологик аҳволини ўрганиш;
• вояга етмаганлар ва ёшлар ўртасида хулқ-атвордаги салбий, ғайриижтимоий ва суицидал ўзгаришларни уларнинг психологик портретини тузиш ва уни тузатиш бўйича манзилли чора-тадбирлар белгилаш орқали барвақт диагностикасини амалга ошириш;
• вояга етмаганлар ва ёшлар ўртасида ҳуқуқбузарликлар содир этилишига ва ўз жонига қасд қилиш ҳолатларига йўл қўймасликка қаратилган психокоррексия ишларни олиб бориш.