Хитой Халқ Республикаси компанияларининг навбатдаги инсонпарварлик ёрдами, яъни коронавирусга қарши курашда фойдаланиш учун тиббиёт ускуналари 10 апрель, жума куни, Мудофаа вазирлигининг махсус самолётида Ўзбекистонга олиб келинди. Бу ҳақда Ташқи ишлар вазирлигининг «Дунё» ахборот агентлиги хабар қилган.
Хабарга кўра, бу Ўзбекистоннинг Пекиндаги элчихонаси ҳамда Шанхайдаги консулхонасининг тўртинчи жўнатмаси, шунингдек, инсонпарварлик ёрдами билан бирга Тошкентга Ўзбекистон ССВ томонидан харид қилинган тиббиёт ускуналари ҳам олиб келинган.
Хитойдан келган қимматли юк таркибига функсионал тиббий кроватлар, ўпкани сунъий шамоллатиш ускуналари, полимераза занжирли реакцияси қурилмалари, болалар ва катталар учун ниқоблар билан таъминланган амбуқоплар, рақамли рентген диагностика тизимлари, эхокардиография ва томир доплерлари учун кардиология сенсори, чақалоқлар учун ўпани сунъий шамоллатиш ускуналари киритилган.
Шунингдек, билирубинни тери орқали аниқлашга мўлжалланган жиҳозлар, жарроҳлик амалиётининг лампалари, ҳаво қабул қилиш шкафлари, жарроҳлик амалиёти столлари, гидравлика билан бошқариладиган стеллар, ANDiS 350 таҳлил ускуналари ва бошқа тиббий воситалар ҳам инсонпарварлик ёрдами билан бирга етиб келган.
Инсонпарварлик ёрдами Ўзбекистонда фаолият юритаётган Хитой тадбиркорлари уюшмаси, Beizhong Yiling, Narimtex, Янлин қишлоқ хўжалиги намойиши, Jiu Mu Touzi, China Construction, Jiangsu Newamstar Packaging Machinery, Jiangsu Penfei, Xiamen Pegasus, Holley Technology, Nanjin Sinopec, Luoyang Daxing company, Shanghai Municipality, Liaoning Leader Investment Holding Group Co.,Ltd., Sany Heavy Industry Co.,Ltd. каби компания ва ташкилотлар томонидан жўнатилган.
Ўзбекистонлик тадбиркор Гулбаҳор Тожимирзаева ҳамда «Шанхай СИПГ» футбол клуби ярим ҳимоячиси, Ўзбекистон миллий терма жамоаси сардори Одил Аҳмедовнинг тиббий буюмлар кўринишидаги хайрия юклари ҳам ушбу самолётда Тошкентга олиб келинган.
Мавзуга доир:
Изоҳ (0)