Самарқандда ёмғир оқибатида сувга тўлган уйларнинг 300 дан ортиғи бузиб ташланиши мумкин

Самарқанд шаҳрида 6 апрель куни кузатилган кучли ёғингарчиликдан сўнг шаҳар кўчаларида сув тошқинлари юз бергани, хонадонлардан бирининг девори қулаб тушгани ҳақида хабар берилган эди.

Самарқанд вилояти ҳокимлиги томонидан маълум қилинишича, шаҳар мутасаддилари кучли ёғингарчиликлар пайтида вазиятдан чиқиш учун барча чораларни кўрмоқда.

Таъкидланишича, бу ишда шаҳар аҳолисининг иштироки ва оқиллиги ниҳоятда зарур бўлмоқда. Сел келганда уйларга сув тошишининг энг биринчи сабаби уйларнинг сув бўйига, ариқлар устига қурилиши ёки йўлдан пастлиги ҳисобланади. Бинобарин, бундай қурилишлар шаҳар архитектураси талабларига ҳам зиддир, дейилади ҳокимлик хабарида.

Ҳокимликнинг маълум қилишича, айни пайтда каналлар ёқасида бир пайтлар ноқонуний йўл билан қурилган, аммо кейин расмийлаштирилган 300 дан ортиқ уйни бузиб ташлаш зарур. Бу жараёнлар судда кўрилмоқда. Аммо баъзи бир фуқароларнинг ўзбошимчалик, ўжарлик ҳолатлари асосий сув йўлларини тиклашга халақит бермоқда.

«Бундай пайтда биз шаҳар аҳолисининг оқилона йўл тутишига, қилинаётган ишлар кўҳна шаҳримиз ободончилиги учун эканлигини тушунишига ишонамиз», — дейилади вилоят ҳокимлигининг хабарида.

Аввалроқ Самарқанддаги сув тошқинлари вақтида қутқарувчилар 52 та хонадонга ёрдам кўрсатгани ҳақида хабар берилганди.