Жанубий Кореяда сўнгги бир суткада коронавирус юқтириб олган 27 киши аниқланди. Эпидемия маркази бўлган Тэгу шаҳрида бирорта ҳам янги ҳолат қайд этилмаган. Мамлакатда касалланганларнинг умумий сони 10450 кишига етган, 208 киши вафот этган. Бу ҳақда Касалликлар назорати ва профилактикаси маркази (KCDC)га таяниб, «РИА Новости» хабар берди.

Фото: AP Photo

Жанубий Корея эпидемиологик хавф даражасини энг юқори даражага кўтарган. Тэгу шаҳри ва Кёнсан-Пукто провинциясининг учта шаҳри асосий ҳалокат ҳудуди деб эълон қилинган. Мамлакат аҳолисидан 19 апрелга қадар ўта зарур ҳоллардан ташқари кўчага чиқмаслик сўралган. Спорт, кўнгилочар ва диний муассасалар ёпилган. Ўқув йили 9 апрелдан онлайн режимида бошланди.

Жанубий Корея Соғлиқни сақлаш вазирлиги ҳузуридаги касалликлар назорати ва профилактикаси маркази маълумотларига кўра, янги қайд этилган ҳолатларнинг бештаси Сеулда, тўққизтаси Кёнгидо провинциясида, еттитаси эса Кёнсан-Пукто провинциясида рўйхатга олинган. Қолган ҳолатлар мамлакатнинг турли ҳудудларида аниқланган. Янги қайд этилган ҳолатларнинг бештаси хориждан келганларда аниқланган.

Ўтган бир суткада 144 киши касалхонадан чиққан, мамлакатда касалликдан тузалганларнинг умумий сони 7117 кишига етган. Мамлакатда коронавирусни аниқлаш бўйича жами 477 мингта тест ўтказилган.

Мамлакатда касалликдан вафот этган 208 кишининг 142 нафари Тэгу шаҳрида қайд этилган, яна 48 киши Кёнсан-Пукто провинциясида вафот этган. Кёнгидо провинциясида 11 киши, Сеулда икки киши, Пусанда эса уч киши қурбон бўлган. Ульсан шаҳри ва Канвондо провинциясида биттадан ўлим қайд этилган.

Аввалроқ Жанубий Кореяда касалланиш ҳолатлари камаяётгани ҳақида хабар берилган эди.