Ўзбекистонда мактаб битирувчилари учун якуний имтиҳонлар ва олий таълим муассасасига кириш синовлари бирлаштирилиши мумкин. Бу Давлат тест маркази томонидан эълон қилинган Президент қарори лойиҳасида кўзда тутилган.
Қарор лойиҳасига кўра, 2021/2022-ўқув йилидан бошлаб якуний давлат аттестацияси учун мажбурий фанлар ва мактаб битирувчиси танлаган бакалавриат таълим йўналишига мос иккита фан бўйича ягона тест синовларини ўтказиш режалаштирилган. Тест синовлари апрель май ойларида ўтказилади.
Мактаб битирувчилари мажбурий учта фан ва ўзи танлаган бакалавриат таълим йўналишига мос иккита фандан тест синовларини ихтиёрий равишда топшириши мумкин бўлади.
Тест синовларининг натижалари ўтказилган куннинг эртасига ДТМнинг расмий веб-сайтида эълон қилинади. Ушбу натижалар мактаб битирувчилари учун ўтказиладиган якуний давлат аттестациясида ва олий таълим муассасаларига ўқишга қабул қилиш танловида инобатга олиниши кутилмоқда.
Тест синовларида мактаб битирувчиси танлаган бакалавриат ўқишига мос фанлардан қониқарли натижа кўрсаца, у қўшимча тест синовларисиз тест синови топширган мос ўқув тили ва таълим йўналиши бўйича танловда қатнашади.
Агар мактаб битирувчиси танлаган бакалавриат таълим йўналишига мос иккита фаннинг камида биридан тест синовини қониқарсиз бажарса, у мактаб томонидан ўтказиладиган якуний давлат аттестациясида иштирок этишга мажбур бўлади.
Тест синовларида иштирок этмаган ёки унда қониқарсиз баҳоланганлар барча абитуриентлар қатори июль август ойларида тест синовларида қатнашиши мумкин бўлади.
Ўзбекистон таълим муассасаларига ўқишга қабул қилиш бўйича Давлат комиссияси томонидан тест синови топшириладиган фанлар, баҳолаш мезонлари, топшириқлар сони, тест синовлари ва танловда иштирок этиш учун рўйхатдан ўтишнинг аниқ муддатлари белгиланади.
Тест синовидан ўтишнинг минимал кўрсаткичи (қониқарлилик даражаси) Халқ таълими вазирлиги томонидан белгиланади. Вазирлик ҳар ўқув йили мактаб битирувчилари ҳақидаги тегишли маълумотларни 1 февралга қадар Давлат тест марказининг махсус дастурига киритиб боради.
Қарор лойиҳасининг муҳокамаси 16 апрелгача давом этади.
Эслатиб ўтамиз, Давлат тест маркази ушбу қарор лойиҳаси ишлаб чиқилаётганини февраль ойида маълум қилган эди. Лойиҳани ишлаб чиқишда мутахассислар Россия (ЕГЭ), АҚШ (SAT) ва Буюк Британия (GCSE) тажрибасини инобатга олган.
Лойиҳа муаллифларининг фикрича, янги тизим кириш тест имтиҳонларини ташкил этиш учун йўналтирилаётган бюджет маблағларини кескин қисқартириш имконини беради, шунингдек, абитуриентларнинг бир фандан такроран имтиҳон топширишининг олдини олади.
Изоҳ (0)