Brent маркасидаги нефть нархи 12 фоизга қимматлашиб, баррель учун 33 долларга чиқди

Brent маркасидаги нефть нархи 12,13 фоизга қимматлашиб, 33,14 АҚШ долларигача кўтарилган. Бу ҳақда «РБК» хабар берди.

ОПЕК+ келишуви аъзоларининг нефть нархини барқарорлаштириш масалаларига бағишланган учрашуви 6 апрелда ўтказилади. Бу ҳақда Озарбайжон Энергетика вазирлиги маълум қилган. Душанбада келишувга аъзо мамлакатлар «Ҳамкорлик тўғрисидаги декларация»ни муҳокама қилади. Саудия Арабистони ОПЕК аъзоларининг Россия ва бошқа катта миқдорда нефть ишлаб чиқарувчи мамлакатларини фавқулодда йиғилишга чорлаган.

Россия президенти Владимир Путин ҳам 3 апрель куни мамлакатдаги катта нефть ишлаб чиқарувчи заводлар раҳбарлари билан мажлис ўтказиб, жаҳон нефть бозоридаги вазиятни муҳокама қилган. У худди шунга ўхшаш мажлисни мартда ўтган ОПЕК+ учрашуви олдидан ҳам ўтказган.

АҚШ президенти Дональд Трамп нефть ишлаб чиқарувчи йирик компанияларни хом ашё қазиб олишни тартибга солиш мақсадида ушбу вазиятни муҳокама қилишга чақирган. Трамп Россия ва Саудия Арабистонининг нефть қазиб олиш ҳажмини суткасига 10-15 миллион баррелга қисқартиришига умид қилишини айтган. Икки давлат ишлаб чиқараётган «қора олтин» ҳажми дунёда талаб қилинадиган хом ашёнинг тахминан 10-15 фоизини ташкил қилади.

ОПЕК+ нефть ишлаб чиқарувчи давлатлар ўртасидаги келишув муддати март охирида якунига етган. 2020 йил 1 апрелидан Саудия Арабистони нефть ишлаб чиқариш ҳажмини кунига 12 миллион баррелгача оширди. Россия эса суткасига 11,3 миллион баррель нефть ишлаб чиқармоқда. Энг катта нефть ишлаб чиқарувчи АҚШ ҳисобланади. Мамлакатда кунига ишлаб чиқариладиган нефть ҳажми — суткасига 13 миллион баррель.ING экспертларининг фикрига кўра, ОПЕК+ келишувига аъзо мамлакатларнинг нефть ишлаб чиқариш ҳажмини суткасига 10 миллион баррелга камайтириши гуруҳ учун катта қадам бўлади. Ишлаб чиқариш ҳажмининг бу қадар камайтирилиши бошқа катта ишлаб чиқарувчилар — Канада, Бразилия ва АҚШни ҳам келишувга жалб қилишни талаб этади.