Республика махсус комиссияси томонидан маълум қилинишича, якка тартибдаги хайрия акциялари давомида коронавируснинг тарқалиш хавфи жуда юқори ҳисобланади. Шу сабабли комиссия қарорига мувофиқ, якка тартибдаги хайрия акциялари 2020 йилнинг 1 апрелидан эътиборан вақтинча тўхтатилади.

Фото: «Дарё»

Комиссия қарорига кўра, хайрия тадбирлари қуйидаги марказлашган тартибда амалга оширилади:

  1. Тошкент шаҳрида Ҳомийлик хайрияларини мувофиқлаштириш маркази «Ўзекспомарказ» миллий кўргазма мажмуаси таркибидаги павильонда ташкил этилади. Қорақалпоғистон Республикаси Нукус шаҳри ҳамда вилоятлар марказларида ҳам худди шундай механизм жорий этилади;
  2. Маҳалла ва оилани қўллаб-қувватлаш вазирлигининг ҳудудий бўлимлари жойлардаги эҳтиёжманд оилалар, ёлғиз кексалар, ногиронлиги бўлган шахслар ва аҳолининг бошқа ёрдамга муҳтож қатлами ҳақидаги маълумотни ҳудудий тегишлилиги бўйича Ҳомийлик хайрияларини мувофиқлаштириш марказларига тақдим этади;
  3. жисмоний ва юридик шахсларнинг беғараз ёрдамлари Ҳомийлик хайрияларини мувофиқлаштириш марказлари орқали санитар-гигиеник талабларга мувофиқлиги кўрикдан ўтказилиб, карантин талабларига қатъий риоя этилган ҳолда (махсус кийим-бош ва шахсий ҳимоя воситалари билан таъминланган ҳолда) эҳтиёжмандларга етказиб берилади.

Шунингдек, аҳолининг ёрдамга муҳтож қатламига хайрия ёрдамларини шахсан етказиш истагида бўлган нодавлат-нотижорат ташкилотлари вакиллари ҳамда саховатпеша инсонлар ва кўнгилли (волонтёр)лар ушбу хайрия тадбирларида яқиндан ҳамкорлик қилиш ва жараёнда қатнашишга таклиф этилади.

Эҳтиёжманд оилаларга берилган хайрия ёрдамлари ҳақидаги маълумотлар жамоатчиликка мунтазам етказиб борилади.

Шу билан бирга, пул кўринишидаги маблағларни «Меҳр-шафқат ва саломатлик» жамоат фондига ўтказиш тавсия қилинади.

Эслатиб ўтамиз, Алишер Усмонов «Меҳр-шафқат ва саломатлик» фондига 20 миллион доллар ажратди. Бунга қадар ДХХБош прокуратура ва МИБ, Президент Давлат хавфсизлик хизмати ходимлари коронавирусга қарши кураш учун ўз маошларининг бир қисмини мазкур жамғармага ўтказиб берган эди. «Қувасойцемент» корхонаси эса жамғармага 100 миллион сўм ажратган.

Шунингдек, комиссиянинг мазкур қарорига мувофиқ, Ўзбекистонда «ўзини яккалаш» ҳаёт тарзи жорий этилди. Унга кўра, Тошкент, Нукус шаҳарлари ва вилоятлар марказларида 65 ёшдан юқори бўлган фуқароларга уйидан ташқарига чиқиш қатъиян ман этилади. Зарурат бўлган тақдирдагина яқин атрофдаги дорихона, озиқ-овқат ва биринчи галдаги товарлар дўконига чиқишга рухсат этилади.