Мажбурий ижро бюросининг Оҳангарон шаҳар бўлими «Оҳангароншифер» акциядорлик жамиятидан 146 нафар ишчига жами 388 миллион сўмлик иш ҳақини ундириб берди. Бу ҳақда Мажбурий ижро бюроси «Дарё»га маълум қилди.
Хабар берилишича, ижро ҳаракатлари давомида қарздорнинг ҳисоб рақамида пул маблағлари бўлмаганлиги сабабли «Суд ҳужжатлари ва бошқа органлар ҳужжатларини ижро этиш тўғрисида»ги қонун талаблари асосида қарздорга тегишли 13 800 дона шифер тайёр маҳсулоти қарздорлик ҳисобига рўйхатга олиниб хатланган. Макур маҳсулотлар тегишли тартибда баҳолатилиб, савдо дўкони орқали савдога чиқарилган.
Натижада қарздор компаниянинг мол-мулки сотуви ҳисобидан суд қарорлари асосида 146 нафар ходимнинг жами 388 790 229 сўмлик ойлик иш ҳақи 2020 йилнинг 30—31 март кунлари тўлиқ ундириб берилган.
Аввалроқ Фарғонада давлатга 77 миллион сўмдан ортиқ зарар етказган «Сувоқова» корхонаси раҳбари уни тўлиқ қоплаб берган эди.
Изоҳ (0)