Коронавирус билан касалланган беморларни даволаш ишларига тиббиёт ходимлари кўнгилли сифатида жалб этилиши мумкин. Бу ҳақда давлат бош санитария инспектори Нурмат Отабеков 30 март куни бўлиб ўтган брифингда маълум қилди.

Фото: «Дарё»

Нурмат Отабековнинг сўзларига кўра, коронавирус билан касалланганларни даволаш ишларига ёрдам бериш истагидаги кўнгилли тиббиёт ходимлари ҳудудий соғлиқни сақлаш бошқармасига мурожаат қилиши мумкин.

Қорақалпоғистон Республикаси соғлиқни сақлаш вазирлиги, вилоятлар ва Тошкент шаҳар соғлиқни сақлаш бошқармалари бундай кўнгилли тиббиёт ходимлари рўйхатларини шакллантиради. Айнан ана шу рўйхатлар орқали тиббиёт ходимлари коронавирус билан касалланганлар даволанадиган шифохоналарга ёлланади.

Маълум қилинишича, беморларни даволаш билан шуғулланаётган шифокорлар ва ўрта тиббиёт ходимлари ҳар 14 кунда ўрин алмашяпти. Кўнгилли сифатида жалб қилинганларнинг хизматидан фойдаланишга биринчи марта эҳтиёж бўлмаса, улар тиббий ходимларнинг навбатдаги бригадасига қўшилиши мумкин бўлади.

Эслатиб ўтамиз, Ўзбекистонда коронавирусга қарши курашда иштирок этадиган шифокорлар ва бошқа ходимлар ҳар 14 кунлик фаолият даври учун Президент томонидан махсус қўшимча рағбатлантириш тўлови белгиланган. Унга кўра, врач ходимларга, врач-лаборантларга — 25 миллион сўм; ўрта тиббиёт ходимларига, ҳамшира-лаборантларга — 15 миллион сўм; кичик тиббиёт ходимларига — 10 миллион сўм; бошқа ходимларга — 5 миллион сўм. Шунингдек, беморлар билан ишлаш давомида коронавирус инфекциясини юқтириб олган тиббиёт, санитария-эпидемиология хизмати ва бошқа ходимларга 100 миллион сўм тўланади.

Тошкентда коронавирусга қарши курашаётган шифокорларнинг бир гуруҳи 29 март куни ўрин алмашди. Шунингдек, коронавирусга чалинган етти нафар бемор соғайиб, реабилитацияга ўтказилди.