Қирғизистонда коронавирус юқтириб олиш бўйича 14 та янги ҳолат қайд этилди. Касалланганларнинг умумий сони 58 кишига етди

Қирғизистонда 27 март ҳолатига кўра, коронавирус юқтириб олиш бўйича 14 та янги ҳолат қайд этилди. Бу ҳақда мамлакат Соғлиқни сақлаш вазирлиги вакили Айнура Акматова Ҳукумат уйида бўлиб ўтган брифингда маълум қилган.

Унинг сўзларига кўра, 7 та ҳолат Жалолобод вилоятида (барчаси Сузак туманида), яна 7 та касалланиш эса Ўш вилоятида кузатилган: 1 та ҳолат Қора Суй туманида, 2 та Новкат туманида, 3 та Узген туманида, 1 та Ўш шаҳрида. Касалланганларнинг 10 нафари аёл, 4 нафари эркак.

14 нафар беморнинг 5 нафари Умра зиёратидан қайтган, 9 нафари эса улар билан мулоқот қилиб, инфекцияни юқтириб олган.

Акматованинг ахборот беришича, Қирғизистонда COVID-19 юқтириб олганларнинг умумий сони 58 нафарга етган, касалланганларнинг ҳаммаси ўзини яхши ҳис этмоқда.

«Касалланганлар билан мулоқот қилганларнинг ҳаммасининг шахси аниқланган. Улар уй шароитида карантинга олинган. Барчаларининг ҳолати барқарор», — дея таъкидлаган Айнура Акматова.

14 нафар янги касалланган фуқароларнинг ёши 1 дан 68 гача экани айтилмоқда.

Мамлакатда коронавирус юқтириб олиш бўйича 58 та ҳолатнинг 27 таси Жалолобод вилоятида, 26 таси Ўш вилоятида, 4 таси Бишкек шаҳрида, 1 таси Боткент вилоятида қайд этилган.

Қирғизистонда 18 март куни коронавирус юқтириб олиш бўйича биринчи ҳолат аниқланган. Аввал Қирғизистоннинг йирик шаҳарлар аҳолисига кечки 8 дан кейин кўчага чиқиш тақиқлангани, мамлакатдан ун ва макаронларнинг олиб чиқиб кетилишига тақиқ қўйилгани ҳақида хабарлар берилган.