Тошкент шаҳрини вилоятлар билан боғловчи постлар ёпилди. «Эркин» йўл-патрул хизмати маскани — суратларда

Аввал хабар қилинганидек, Республика махсус комиссияси кўрсатмасига кўра, Транспорт вазирлиги томонидан 24 март куни соат 00:01 дан бошлаб Тошкент шаҳрига республиканинг барча ҳудудларидан кириш чиқишни ҳар қандай транспорт воситаларида (автобус, автомобиль, авиа, темир йўл) амалга ошириш тўхтатилган.

Шунингдек, «Коронавирус инфекцияси тарқалишига қарши қўшимча чора-тадбирлар тўғрисида» ҳукумат қарорига (176-сон, 23.03.2020 й.) асосан Ўзбекистон ҳудудида коронавирус инфекцияси тарқалишига қарши кучайтирилган тартиб жорий этилган.

Унга кўра бошқа ҳудудлардан Тошкент шаҳрига кириш (автобус, микроавтобус, енгил автотранспорт, авиақатновлар ва темир йўл транспорт воситалари орқали) тўхтатилди.

Тошкент шаҳрида доимий рўйхатдан ўтган шахслар, шунингдек, Тошкент вилоятида доимий рўйхатдан ўтган ҳолда Тошкент шаҳрида меҳнат қилаётган давлат ташкилотлари ходимларининг (нодавлат ташкилотларида – иш берувчининг тегишли рухсатномаси асосида) шаҳарга кириш ва чиқишига рухсат берилди.

Тошкент шаҳар ҳокимлиги ушбу фуқароларнинг корхона ва ташкилотларига келиши ва кетиши бўйича барча ишлар 2020 йил 24 мартдан бошлаб «Тошшаҳартрансхизмат» АЖ томонидан шартнома асосида амалга оширилишини маълум қилди.

Тақдим этиладиган автобусларнинг ҳар бири махсус таниқлилик белгиси (эмблема), йўловчининг тана ҳароратини ўлчаш учун тепловизор билан жиҳозланади. Шунингдек, ҳар бир автобус ҳар куни дезинфекция қилиниши таъминланади. Ҳар бир йўловчининг тана ҳарорати автобусга чиқишдан аввал камида 5 метр масофада ўлчанади ва ҳарорати юқори бўлган йўловчи автобусга чиқарилмайди, дейилган матбуот хизмати хабарида.

Эслатиб ўтамиз, Ички ишлар вазири ўринбосари Дониёр Қодиров карантин даврида вилоятларда илгари фаолият юритган йўл ҳаракати хавфсизлиги масканларининг фаолияти вақтинча тикланишини ҳам маълум қилган. Постларда Миллий гвардия ва Ички ишлар вазирлиги ходимлари ҳамкорликда хизмат олиб боради.

«Дарё» мухбири Тошкент шаҳрини вилоятлар билан боғловчи, бугун тунда ёпилган «Эркин» йўл-патрул хизмати масканида бўлиб, фоторепортаж тайёрлади.