Ichki ishlar vazirligi viloyatlararo postlar faoliyati vaqtincha qayta tiklanishini ma’lum qildi

Viloyatlararo yo‘l harakati xavfsizligi maskanlari faoliyati qayta tiklanadi. Bu haqda ichki ishlar vaziri o‘rinbosari Doniyor Qodirov axborot va ommaviy kommunikatsiyalar agentligi maxsus shtabida tashkil etilgan brifingda ma’lum qilgan.

IIV mutasaddisi mazkur tadbir davomida karantin davrida aholi xavfsizligini ta’minlashda yuzaga kelgan qator masala va muammolar yuzasidan savollarga javoblar bergan.

“Karantin davrida viloyatlarda ilgari faoliyat yuritgan yo‘l harakati xavfsizligi maskanlarining faoliyati vaqtincha tiklanadi.

Bu chorani yuzaga kelayotgan muammolarni tizimli bartaraf etish maqsadida qo‘llayapmiz. Ularning vazifasi Toshkent shahriga kirib kelayotgan avtomobil haydovchilariga harakat cheklangani haqida (yangiliklardan bexabar bo‘lsa) axborot berishdan iborat. Har bir viloyatdagi yo‘l harakati xavfsizligi maskanlarida ogohlantiruv va ma’lumot berish tizimini yo‘lga qo‘yamiz.

Postlarda Milliy gvardiya va Ichki ishlar vazirligi xodimlari birga hamkorlikda xizmat olib boradi”, — deya ta’kidlagan Doniyor Qodirov.

Avval Toshkent shahrining 2020-yilning 24-mart kuni soat 00:01 dan boshlab yopilishi , 22-martdan Toshkent shahri hududida barcha jamoat transporti — avtobus, metro va yo‘nalishli taksilar harakati vaqtinchalik to‘xtatilgani haqida xabarlar berilgan. Toshkent viloyati Bo‘stonliq tumaniga kirish ham yopilgan. Viloyatdagi barcha buyum bozorlarining faoliyati ham vaqtincha to‘xtatilgan. Oliy Majlis qonunchilik palatasi deputati “Yuksalish” umummilliy harakati raisi Akmal Burxonov Toshkentda favqulodda holat joriy etib, karantinni nazorat qilishga armiyani qisman safarbar etishni taklif qilgan.