Наманган шаҳридаги Grand Sherdor бутик-отели мутасаддилари коронавирус инфекциясига қарши кураш учун сафарбар қилинган мутахассисларга бепул жой ажратилишини маълум қилди. Бу ҳақда «Дарё» мухбири Азизбек Абдувалиев хабар бермоқда.
Меҳмонхона иш бошқарувчиси Комилжон Бекматовга кўра, бу мақсадлар учун 21 та хона ва 37 та жой ажратиб қўйилган.
«Ҳозирнинг ўзида 5 нафар мутахассисни жой билан таъминладик. Шаҳар штаби буюртмасига мувофиқ, яна 32 кишини жойлашга тайёрмиз. Синовли кунларда қўлимиздан келганча кўмак бериш ниятидамиз,» — дейди Комилжон Бекматов.
Маълумот учун, ўтган йил сентябрь ойида фойдаланишга тоширилган Grand Sherdor бутик-отели шу тоифадаги Ўзбекистондаги учинчи, Фарғона водийсида эса илк меҳмонхона ҳисобланади.
Наманганда юқоридаги каби хайрли ташаббусга қўшилаётганлар сони ортиб бормоқда. Жумладан, уйчилик тадбиркор Мансуржон Анорбоев ўз ҳисобидан 30 та дезинфекция аппарати ва 20 та махсус кийим-бошни туман санитария-эпидемиологик осойишталик марказига совға қилди.
Профилактик тадбирларда муҳим аҳамиятга эга бўлган мазкур аппаратдан 10 таси туман халқ таълими ва мактабгача таълим бўлимларига ажратилди.
Эслатиб ўтамиз, 24 мартдан Ўзбекистонда коронавирус инфекцияси тарқалишига қарши кучайтирилган тартиб жорий этилди. Айни пайтда Ўзбекистонда коронавирусга чалинганлар сони 50 нафарни ташкил этмоқда.
Изоҳ (0)