Урумчи округида 16 март, душанба куни, «Олтин пальма» кинотеатри очилди. Бу коронавирус пандемияси сабаб узоқ давом этган карантиндан сўнг Хитойда қайта очилган илк кинотеатр ҳисобланади, дея хабар қилади «КиноПоиск».
Жадвалдан 22 та сеанс ўрин олганига қарамай, «Олтин пальма» очилган куни бирорта ҳам томошабин келмаган.
Variety нашрининг ёзишича, томошабинларни «фильмни фарзандлари билан томоша қилишга келган ота-оналар учун бепул» деган акция ҳам жалб эта олмаган. 16 март кунги репертуардан ватанпарварлик фильмлари, криминал триллер ва бир неча ўнлаб мултфильмлар ўрин олган.
«Олтин пальма»нинг очилишига Шинжон-Уйғур автоном вилоятида коронавирус билан касалланганлар сонининг камайгани сабаб бўлган. 15 март ҳолатида кўра, ҳудудда COVID-19 вирусини юқтириб олиш бўйича бирорта ҳолат аниқланмаган. Кинотеатр вакилларининг таъкидлашича, «Олтин пальма» ўз фаолиятини тест режимида давом эттиради, ходимлар эса ташриф буюрувчиларнинг фикрларига қулоқ тутади.
Ҳозирда «Олтин пальма»да қатъий қоидалар жорий этилган. Кинотеатрда уч киши ишламоқда, улар бинони мунтазам дезинфекция қилади. Чипталарни фақат кассадан сотиб олиш мумкин. Бундан ташқари кинотеатрга киришдан олдин ташриф буюрувчиларнинг тана ҳарорати ўлчанади ва улар ниқобда бўлиши шарт.
Мавзуга доир: Хорижда одамлар карантин тартибини бузмаслиги учун онлайн-кинотеатрлар, кўнгилочар порталлар бепул ишламоқда
Изоҳ (0)