Ўзбекистон бош давлат санитария врачининг 17 март куни «COVID-19 коронавирус инфекциясининг республика ҳудудида тарқалишини олдини олиш, касалликни тўғри ташхислаш ва даволаш жараёнида профилактик чеклов тадбирларини жорий этиш тўғрисида»ги 5-сонли қарори қабул қилинди, дея хабар берди Санитария-эпидемиологик осойишталик агентлиги (СЭОА) матбуот хизмати .
Фото: «Дарё»
Ушбу қарорга мувофиқ, 17 мартдан бошлаб қуйидаги тартиблар жорий этилади:
- барча даволаш-профилактика муассасаларида COVID-19 коронавирус инфекцияси бўйича чеклов ўрнатилади;
- беморларни кўргани келган ва бошқа бегона шахсларни даволаш-профилактика муассасаларига кириши, беморларни ташхис-даволаш ишларига боғлиқ бўлмаган шахслар билан тўғридан-тўғри мулоқот қилишлари тақиқланади;
- даволаш-профилактика муассасаларига келаётган беморларни тана ҳароратини ўлчаш, эпидемиологик суриштирув ва коронавирус белгиларига текшириб филтрдан ўтказиш ташкил этилади;
- даволаш-профилактика муассасаларига кириш ва чиқишни қатъий тартиб асосида амалга оширилиши ва ички ишлар бошқармаларини жалб этган ҳолда муассасани периметри бўйлаб кун-у тун қўриқланиши жорий этилади;
- Санитария-эпидемиологик осойишталик агентлиги (СЭОМ) ҳузуридаги вирусология лабораторияси COVID-19 коронавирус инфекциясига лаборатория таҳлилларини ўтказиш миллий референс лабораторияси деб белгиланади ҳамда Вирусология илмий-тадқиқот институти ва ҳудудий СЭОМ вирусология лабораторияларида ўтказилган таҳлиллар мусбат натижа берган ҳолларда миллий референс лабораториясида қайта текширувдан ўтказилиб, унинг натижасига асосан якуний ташхис қўйиш амалиёти жорий этилади;
- бемор ва унинг оила аъзолари, бемор билан мулоқотда бўлганларнинг шахсий маълумотлари сир сақланиши бўйича қатъий назорат ўрнатилади;
- эпидемик вазият нохуш бўлган ҳудудлардан келган шахслар ҳамда улар билан мулоқотда бўлганларни касалликка лабораторияда текшириш учун Санитария-эпидемиологик осойишталик марказларида кириш-чиқиш тартиби бўлган алоҳида махсус намуна олиш ва кутиш хоналари ташкил этилади, бунда, таҳлил натижаси чиққунга қадар беморларни юз ниқобини таққан ҳолда кутиб туришлари жорий этилади.
Қарорнинг тўлиқ матни билан қуйида ҳавола орқали танишиш мумкин.
Эслатиб ўтамиз, Ўзбекистонда 15 март куни коронавирус юқтириш билан боғлиқ биринчи ҳолат қайд этилгани сабабли хорижий мамлакатлар билан барча авиа ва автоқатновлар тўхтатилди. Чет элда қолган ватандошлар чартер рейсларида қайтарилиши маълум қилинди.
Мавзуга доир:
Аввалроқ Ташқи ишлар вазирлиги Ўзбекистон фуқароларига ватанга қайтиш учун давлат чегарасидан ўтиш тақиқланмаганини маълум қилган эди. Ҳозирча Ўзбекистонда коронавирус юқтириб олганлар сони 11 кишига етди. Карантин сабаб Тошкентдаги барча талабалар турар жойлари 19 мартдан тўлиқ ёпилиб, дезинфекция қилинади.
