Самарқандда фуқарони ўқишга киритишни ваъда қилиб, 23 миллион сўмни фирибгарлик билан қўлга киритган фуқарога суд ҳукми ўқилди. Бу ҳақда «Дарё» мухбири Фарҳод Норбўтаев хабар бермоқда.
Судланувчи У.К. 2019 йил августида фуқаро Н.М.ни Самарқанд давлат университетига супер-контракт асосида ўқишга киритишини ваъда қилган. Ота-онаси хорижда ишлаб юрган Н.М. улар юборган пулдан олиб, У.К.га 2 минг доллар ва 1,2 миллион сўм пул берган.
У.К эса уни ишонтириш мақсадида 2019 йил октябрида Н.М.нинг номига сохта тўлов бланкаси, СамДУнинг икки томонлама контракт-шартномаси ва қабул комиссиясининг маълумотномасини қалбакилаштириб, жабрланувчига тақдим қилган.
Судья Т.Байзаковнинг маълум қилишича, судланувчи У.К. Жиноят кодексининг 168-моддаси (фирибгарлик) 2-қисми «а» банди ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) 1-қисмида назарда тутилган жиноятни содир қилганликда айбли деб топилган.
Унга ойлик иш ҳақининг 20 фоизини давлат фойдасига ушлаб қолган ҳолда 2 йил 3 ойга ахлоқ тузатиш ишлари жазоси тайинланган.
