Президент Шавкат Мирзиёев Хоразм вилоятига ташрифи доирасида «Ҳазорасп» эркин иқтисодий зонасидаги Develop Textile хорижий корхонаси фаолияти билан танишди, дея хабар бермоқда Президент матбуот хизмати.
Қайд этишларича, Develop Textile «Ҳазорасп» эркин иқтисодий зонасидаги истиқболли лойиҳалардан бири. Ушбу компания 13 миллион долларлик лойиҳа асосида 2020 йил январда ишга туширилган. Германия, Туркия, Хитойдан замонавий дастгоҳлар келтириб ўрнатилган. 760 та иш ўрни яратилган.
Бу ерда йилига 4 минг тонна бўялган тайёр чоксиз трикотаж мато, 14 миллион дона турли хил тикувчилик маҳсулотлари ишлаб чиқарилмоқда. Германия, Франция ва Европанинг бошқа давлатларига йилига ўртача 12 миллион долларлик экспорт қилиш режалаштирилган.
Шавкат Мирзиёев корхонадаги ишлаб чиқариш жараёни ва тикувчилик маҳсулотларини кўздан кечириб, мутахассис ва тикувчилар билан суҳбатлашган. «Президентимиз бу каби замонавий компанияларни кўпайтириш орқали вилоятда етиштириладиган пахта хом ашёсини тўлиқ қайта ишлаш, фақат тайёр маҳсулот экспорт қилиш зарурлигини таъкидлади», — дейилади хабарда.
Изоҳ (0)