Ижтимоий тармоқларда 2019 йилнинг охирида Жиззах вилояти Дўстлик туманида 5 қаватли уйлар қурилишида арматурасиз плиталар ишлатилгани ҳақида видео тарқалган эди. АОКАда 9 март, душанба куни, бўлиб ўтган матбуот анжуманида Қурилиш вазирлиги ҳузуридаги Қурилишни стандартлаштириш республика маркази раҳбари Саидаслам Хўжаев ушбу видеога муносабат билдирди, деб ёзмоқда «Kun.uz».
Марказ раҳбарининг сўзларига кўра, плиталарда турли хил арматура ишлатилади. Жиззах вилоятидаги мазкур объектда симли арматура ишлатилган. Плиталарнинг синишига уларнинг нотўғри ётқизилгани сабаб бўлган.
«Кўп гап темир-бетон буюмларининг хусусиятларини тушунмасликдан келиб чиқади. Бетон мўрт нарса ҳисобланади. Бино қурилишида фойдаланиш учун унинг таркибида металл бўлиши керак. Биз сейсмик фаол зонада жойлашганлигимиз сабабли, қурилишда ишлатиладиган плиталарга тегишли талаблар мавжуд. Яъни тўртта арматура панжараси бўлиши керак, ён томонларда узунасига шпонлар бўлиши керак. Шундагина плиталар бинонинг зилзилага чидамлилигини таъминлайди.
Плиталарда ҳар хил турдаги арматуралардан фойдаланилади. Одамлар кўникиб қолган стерженли арматуралардан ташқари, симли арматуралар, юқори кучга эга арматуралар ишлатилади. Мутахассис бўлмаган киши анъанавий стерженли арматура ишлатилмайдиган плиталарни кўриб, плитада арматура ишлатилмаган, деб ўйлаши мумкин. Бунинг исботи — ижтимоий тармоқларда оммавий муҳокаманинг мавзусига айланган видео.
Синган бетон плита ичидаги симли арматура видеода аниқ кўринади. Агар плитада арматура бўлмаганида, уни заводдан қурилиш майдончасига олиб келиш мумкин бўлмас эди», — дея тушунтирди марказ раҳбари.
Хўжаевнинг маълум қилишича, ижтимоий тармоқларда тарқалган видеода акс этган Жиззах вилояти Дўстлик туманидаги объектга Қурилиш вазирлиги мутахассислари ташриф буюриб, у ердаги барча плиталарнинг сифатини ўрганган.
Ўрганиш давомида плиталарда арматуралар мавжудлиги, аммо ҳар хил миқдорда эканлиги аниқланган. Шунингдек, бир қатор бошқа камчиликлар ҳам аниқланган.
Қайд этилишича, қурилишдаги барча плиталар ўрганилган. Бинонинг зилзилага чидамлилигини таъминлаш бўйича ишлар олиб борилмаганлиги аниқланган.
Бундан ташқари, плиталарнинг юқори қисмида монтаж арматураси бўлиши керак, аммо Жиззахдаги объект плиталарида бундай арматура бўлмаган.
Таъкидланишича, қурилиш материалларини синовдан ўтказиш учун барча талабларга жавоб берадиган маҳсулотлар олиб келинади, аммо объектларда ишлатиладиган барча маҳсулотлар белгиланган талабларга аниқ жавоб бермайди.
Саидаслам Хўжаевнинг сўзларига кўра, қурилиш материаллари ишлаб чиқарадиган ҳар бир корхона ўз лабораториясига эга бўлиши керак. Аммо бугунги кунда аксарият ишлаб чиқарувчилар бундай имкониятга эга эмас, улар бошқа ташкилотлар лабораторияларидан шартнома асосида фойдаланади. Бу эса маҳсулотларнинг қурилиш стандартлари талабларига мувофиқлигини мониторинг қилишда муаммолар туғдирмоқда.
Изоҳ (0)