Жаҳон бўйлаб кенг ёйилаётган COVID-19 коронавируси билан касалланиш ва ўлим ҳолати кўпроқ ёши катта инсонларда кузатилмоқда. Бу ҳақда 10 март, сешанба куни, АОКАда Ўзбекистонда коронавирус инфекциясининг профилактикаси ва унинг кириб келишининг олдини олиш масалаларига бағишлаб ўтказилган матбуот анжуманида маълум қилинди.
«Дарё мухбирининг хабар беришича, тадбирда халқаро ташкилот вакиллари, Ўзбекистондаги элчихона ходимлари ва журналистлар иштирок этди.
Анжуманда соғлиқни сақлаш вазири Алишер Шодмонов COVID-19’нинг дунёга хавф солаётгани, эпидемиянинг мамлакатга кириб келиши ва тарқалишининг олдини олиш бўйича кўрилаётган чоралар тўғрисида гапирди.
«Хитойда қайд этилган эпидемия афсуски, дунёнинг юзлаб мамлакатида ҳам тарқалди ва бу кун сайин кенгаймоқда. Ўзбекистон раҳбарияти, ҳукумати ва тегишли вазирликлар доимий мониторинг ва таҳлил олиб боряпти. Ҳар кунги статистик маълумотлар махсус штабда таҳлил қилиниб, зарур профилактик чоралар кўрилмоқда.
Минг афсуски, коронавирус бўйича рақамлар тобора фақат ўсмоқда. Лекин бизни қувонтирадиган жиҳатлар ҳам йўқ эмас. Касалликни даволаш борасида амалга оширилаётган саъй-ҳаракатлар ижобий ютуқларни ҳам беряпти. Масалан, Уханда кучли тартиб туфайли кескин тарқалиш пасайиб, ўлим сони камайди. Лекин Жанубий Корея ва Италияда тарқалиш кўрсаткичи юқорилади. Жанубий Кореяда вазият ижобий томонга ўзгарган бўлса-да, бироқ ўлим ҳолати кучаймоқда. Эронда касаллик кўрсаткичлари ўсиб боряпти. Франция, Германия каби ривожланган мамлакатларда ҳам вазият яхши эмас. Японияда эса барқарорликка эришиш бошланди.
Жаҳон соғлиқни сақлаш ташкилоти томонидан тайёрлаган харитада кўрганларингиздек, бу касаллик барча қитъаларни қамраб олди. Марказий Осиё эса коронавирусдан ҳоли ҳудуд бўлиб турибди. Аммо бу ҳалқа борган сари қисқармоқда. Шундан келиб чиққан ҳолда, ЖССТ билан ҳамкорликда мунтазам равишда ишлаяпмиз. Президентимиз фармойишига асосан, фавқулодда комиссия ташкил этилган. Унга Ўзбекистон бош вазири Абдулла Ниғматович Арипов раислик қилмоқда. Мазкур комиссия иши идоралараро, секторлараро доимий равишда олиб борилмоқда», — деди Алишер Шодмонов.
Изоҳ (0)