Мудофаа вазирлигига қарашли «Ватанпарвар» газетасининг собиқ мухбири давлатга хиёнатда айбланиб 12 йилга ҳукм қилинди
Ўзбекистон ҳарбий суди Мудофаа вазирлиги «Ватанпарвар» газетасининг собиқ мухбири Владимир Калошинни умумий тартибдаги колонияда 12 йилга қамоқ жазосига ҳукм қилинди. «Gazeta.uz»нинг хабар беришича, бу ҳақда журналистнинг Россияда яшаётган қизи Анастасия Епишева маълум қилган.
Унинг айтишича, суд жараёни 7 февраль куни ёпиқ тарзда ўтказилган. Владимир Калошиннинг ўзи унга қўйилаётган айбловларни тан олмаяпти. Журналистни адвокатлар Аллан Пашковский ва Мурод Собиров ҳимоя қилган.
4 март куни бўлиб ўтган охирги суд мажлисида суд Владимир Калошинни Жиноят кодексининг 157-моддаси 1-қисмида назарда тутилган жиноят (Давлатга хоинлик қилиш, яъни Ўзбекистон фуқароси томонидан жосуслик, чет эл давлатига, чет эл ташкилотига ёки уларнинг вакилларига давлат сирларини етказиш ёхуд Ўзбекистонга қарши душманлик фаолияти олиб боришда бошқача ёрдам кўрсатиш йўли билан Ўзбекистон суверенитетига, ҳудудий дахлсизлигига, хавфсизлигига, мудофаа салоҳиятига, иқтисодиётига зарар етказишга қаратилган қасддан содир этилган қилмиш)ни содир этганликда айбдор деб топган. Ушбу моддада 10 йилдан 20 йилгача озодликдан маҳрум этиш жазоси белгиланган.
Анастасия Епишева адвокатларнинг сўзларига асосланиб айтишича, суд жараёни процессуал қонунбузарликлар билан ўтган. Судья томонларнинг мажлисга тайёрланиш имкониятларини ҳисобга олмаган ҳолда, мажлисларни жуда тез ўтказган.
Шунингдек, унинг таъкидлашича, суд адвокатларнинг (ҳибсга олиш) эҳтиёт чорасини ўзгартириш тўғрисидаги даъвосини қаноатлантиришдан бош тортган, бу муддат Тошкент ҳарбий судининг 2019 йил 21 сентябрдаги қарорига биноан 2019 йил 1 декабрда тугаган.
Умумий ҳисобда, судьяни ишдан олиш, ашёвий далилларни талаб қилиш ва текшириш, гувоҳларни чақириш ва экспертиза ўтказиш каби 10 дан ортиқ даъволар рад этилган. Дастлабки тергов органи томонидан гувоҳлар деб кўрсатилган сўроқ қилинганлар эса айбловни тасдиқловчи тўғридан-тўғри ёки билвосита далиллар келтирмаган.
Владимир Калошиннинг қариндошлари ҳам у ҳибсга олинган 2019 йил 2 июлдан бошлаб унга нисбатан қариндошлари ва дўстларига қарши турли таҳдидлар кўринишида психологик босим ўтказиб келинганини айтган.
28 февраль куни адвокат Аллан Пашковский мижозга нисбатан қийноқ ва таҳдидлар бўлаётгани тўғрисида Бош прокурор номига шикоят аризаси ёзган. Владимир Калошиннинг ўзи эса бу ҳақда судга ёзма равишда маълум қилган ва суд қарорида буни эътиборга олишни, шунингдек, бу ҳақда Бош прокурорни хабардор қилиб, барча зарур қонуний чоралар кўришни сўраган.
Владимир Калошин Ленин номидаги Тошкент олий умумқўшин қўмондонлик мактабини тамомлаган, шундан сўнг у лейтенант унвони билан Термиздаги Туркистон ҳарбий округига юборилган. Байкалорти ҳарбий округида ва Совет кучларининг Жанубий гуруҳида (Венгрия) хизматни ўтаб бўлгач, СССР парчалангандан сўнг, Байкалорти ҳарбий округига қайтган. У ерда маданий-маърифий ишлар билан шуғулланган ва ҳарбий газеталарга мақолалар ёзган.
1992 йилда эса Мудофаа вазирлигига қарашли «Ватанпарвар» газетасига юборилган. 1992 йилнинг июлидан бошлаб газетанинг ҳарбий хизмат ва ўқув ишлари бўлими бошлиғи лавозимида ишлаб келган. Президентнинг 2000 йил 28 августдаги фармони билан «Шуҳрат» медали билан тақдирланган. 2005 йил 7 ноябрь куни ҳақиқий ҳарбий хизматдан резервга бўшатилиб, Мудофаа вазирлиги пенсионерига айланган. 2007 йил 2 апрелдан 2019 йил 2 июлгача ҳибсга олингунга қадар у «Ватанпарвар» газетасида шарҳловчи бўлиб ишлаган.
Анастасия Епишеванинг сўзларига кўра, Владимир Калошин резервга ўтказилгандан сўнг газетада шарҳловчи сифатида ишлашда давом этаган бўлса ҳам ҳарбий кийим киймаган ва махфий маълумотларга кириш ҳуқуқига эга бўлмаган. Унинг айтишича, Калошин иккинчи гуруҳ ногирони ва бронхиал астма билан касалланган.
2020 йилнинг январида давлатга қарши хиёнат бўйича айбланган ТИВнинг собиқ ходими Қодир Юсуповга суд ҳукми эълон қилинганди.
