Ўзбекистон Туризмни ривожлантириш давлат қўмитаси томонидан 12—16 март кунлари ўтказилиши режалаштирилган «Зиёрат туризми ҳафталиги» дунё боֲ‘йлаб коронавирус тарқалиши сабабли кейинга қолдирилди. Бу ҳақда қўмита томонидан хабар берилди.
Ўзбекистон Соғлиқни сақлаш вазирлигининг таъкидлашича, бугунги кунга қадар мамлакат ҳудудида коронавирус билан касалланганлар аниқланмаган. Жаҳон соғлиқни сақлаш ташкилоти коронавирус билан боғлиқ эпидемик хавф жаҳон миқёсида жиддий тус олаётганини маълум қилди.
Инфекциянинг минтақалараро тарқалиб бораётгани муносабати билан дунёнинг кўплаб мамлакатлари томонидан карантин ва фуқароларнинг ҳаракатланиши бўйича чекловлар жорий этилди, дейилади қўмита хабарида. Шунингдек, инфекция тарқалишининг олдини олиш мақсадида дунё бўйлаб йирик тадбирлар кечроқ муддатга қолдирилмоқда.Қўмита томонидан таъкидланишича, «Зиёрат туризми ҳафталиги» ўтказиладиган сана аниқ бўлиши билан бу ҳақда қўшимча маълумот берилади.
Аввалроқ коронавирус сабабли Тошкентда 23—25 апрель кунлари бўлиб ўтиши режалаштирилган Tashkent Law Spring II халқаро юридик форуми кейинга қолдирилди. Шунингдек, биринчи Тошкент халқаро инвестиция форуми коронавирус сабабли 2020 йилнинг кузига қолдирилган эди. Ўзбекистонда халқаро тадбирлар ва спорт мусобақалари вақтинча тўхтатилди.
Мавзуга доир: Коронавирусни деб жаҳон бўйлаб қайси тадбирлар бекор қилинди ёки бошқа санага қолдирилди? Рўйхат
Изоҳ (0)