Xitoydagi vaziyat
Xitoy Sog‘liqni saqlash milliy komissiyasining ma’lum qilishicha, mamlakat bo‘ylab virusni yuqtirib olganlar soni 78 824 kishini tashkil qilib, 32 495 kishi davolanishga muvaffaq bo‘ldi. Koronavirus bilan kasallanish oqibatida vafot etganlar soni 2858 kishiga yetdi.
Jahon sog‘liqni saqlash tashkiloti 27-fevral holatiga ko‘ra, jahonning 48 mamlakatida koronavirus infeksiyasi aniqlanib, umumiy hisobda 82 249 kishi virusni yuqtirib olgani haqida ma’lum qildi.
Shuningdek, Xitoy davlat sog‘liqni saqlash qo‘mitasi mamlakatda koronavirusning yangi turini yuqtirganlarning qariyb 46 foizi tuzalgani va kasalxonadan chiqarilgani haqida xabar berdi.
Xitoy rasmiylari katta pul mukofotlarini va’da qilib, aholini tibbiy ko‘rikdan o‘tishga jalb qilmoqda. Syantszyan shahri rahbariyati shifokor qabuliga kelgan har bir kishiga bir ming yuan, organizmida koronavirus aniqlangan har biri kishiga esa 10 ming yuan taklif qilmoqda.
Xitoylik taniqli aktyor, rejissor, kaskadyor va ssenariynavis Jeki Chan o‘zining koronavirus bilan kasallangani haqida tarqalgan xabarlarga izoh berdi. “Hammaga men haqimda qayg‘urishgani uchun tashakkurimni izhor etaman. Iltimos, xavotirga tushmang, men karantinda emasman. Qolganlar ham xavfsiz yerda, sog‘-salomat bo‘lishni tilayman!” — deb yozgan Jeki Chan Instagram’da.
O‘zbekistondagi vaziyat
O‘zbekiston sog‘liqni saqlash vaziri koronavirus muhokamasiga bag‘ishlangan videoselektor yig‘ilishi o‘tkazdi. Vazirlik O‘zbekistonda koronavirusning oldini olishda amalga oshirilayotgan ishlar xotirjam bo‘lishga asos bo‘lmasligi, ogoh bo‘lishga, jumladan, shaxsiy gigiyena qoidalariga qat’iy rioya qilishga chaqirmoqda.
Ko‘rishni qat’iy tavsiya qilamiz: Makkadagi niqob taqqan ziyoratchilar, haroratni o‘lchovchi robot, yongan daraxtdan chiqqan kurtak. 27-fevralning eng qiziqarli suratlari
Biroq Jahon sog‘liqni saqlash tashkiloti rahbari Tedros Gebreyesus hech bir davlat koronavirusdan xoli ekanligiga o‘zini ishontirmasligi kerakligini ma’lum qildi. “Mamlakatda koronavirus infeksiyasi bilan kasallanish holati umuman bo‘lmasligini taxmin qilish tom ma’noda halokatli xato hisoblanadi”, — deydi Gebreyesus.
Uzbekistan Airways aviakompaniyasining Toshkentdan Jidda va Madinaga bo‘lgan barcha qatnovlari 2020-yilning 27-fevralidan boshlab vaqtinchalik to‘xtatildi. Bunga 25 ta davlat, jumladan, O‘zbekistondan kelgan turist va ziyoratchilarning Saudiya Arabistoniga kirishi vaqtinchalik man etilgani sabab bo‘lgan. Saudiya hukumati ushbu qarorni mamlakat COVID-19 koronavirusi tarqalishining xavfini oldini olish zarurligi bilan izohlagan. Shuningdek, Saudiya Arabistoni yana 7 ta davlat fuqarolariga sayyohlik vizasini berishni to‘xtatib qo‘ydi. Bular — Xitoy, Yaponiya, Singapur, Janubiy Koreya, Malayziya, Italiya va Qozog‘iston davlatlaridir.
Jahondagi vaziyat
Janubiy Koreyada koronavirus bilan kasallanganlar soni 2 ming kishidan oshib ketdi. Koronavirus bilan kasallangan yana 256 ta yangi holat qayd etildi.
Eronda xotin-qizlar va oila masalalari bo‘yicha vitse-prezident Ma’suma Ebtekar COVID-19 koronavirusini yuqtirib olganini tan oldi. Ebtekar Eron islom respublikasida yangi turdagi virus qayd etilgan birinchi siyosatchi emas. Topshirilgan test natijalari Eron Majlisining milliy xavfsizlik masalalari qo‘mitasi rahbari Mujob Zonnur, deputat Mahdum Sodiqiyda ham ijobiy natija ko‘rsatgan. Shuningdek, Eronda sog‘liqni saqlash vaziri o‘rinbosari Iroj Xarirchi ham koronavirus bilan kasallangan. Eronning Vatikan va Eron davlatlaridagi sobiq elchisi Xadi Xisravshohiy esa koronvairus bilan kasallanib vafot etdi.
JSST ma’lumotlariga ko‘ra, Eronda 245 nafar odam koronavirus bilan kasallangan, shundan 26 ta vaziyatda o‘lim holati kuzatilgan.
AQSh vitse-prezidenti Mayk Pens Oq uyning koronavirus tarqalishiga qarshi kurash bo‘yicha koordinatori lavozimiga Debbi Birksni tayinladi, u avval OIV/OITS epidemiyasiga qarshi kurashish muammolari bo‘yicha hukumat siyosatini olib borgan.
Shveysariyada koronavirus sabab Jeneva avtosaloni bekor qilindi. Shveysariyada 28-fevral holatiga ko‘ra, koronavirus infeksiyasini yuqtirib olish bilan bog‘liq 15 ta holat aniqlandi.
Fransiyada sog‘liqni saqlash vaziri Olivye Veranga ko‘ra, COVID-19 koronavirusi bilan kasallangan bemorlar soni qariyb ikki baravar ko‘payib, 27-fevral holati bo‘yicha 38 nafarni tashkil qilmoqda.
Mavzuga doir: Koronavirus Yevropa bo‘ylab tarqalishda davom etmoqda
Ozarbayjonda Rossiya fuqarosida koronavirus aniqlandi. Bu koronavirus yuqtirib olish bilan bog‘liq Ozarbayjondagi ilk holatdir.
Bank of America yil so‘ngida oxirgi iqtisodiy inqirozdan ham og‘ir damlar kelishini taxmin qildi. Ma’lumotlarga ko‘ra, iqtisodiy o‘sish sur’atlari yil oxirida 2,8 foizgacha pastlaydi, 2009-yildan beri ushbu ko‘rsatkich muntazam ravishda o‘sib kelayotgandi va doim 3 foizdan yuqori bo‘layotgandi. Bunday pastlashning asosiy sabablaridan biri sifatida koronavirus epidemiyasi oqibatida Xitoy iqtisodiyotidagi sekinlashuv kuzatilgani deb baholanmoqda.
Futbol
Koronavirus sabab “Yuventus”—“Inter” va A Seriyaning yana to‘rtta o‘yini tomoshabinlarsiz o‘tadi. Koronavirus sabab “Paxtakor”ning OChLdagi o‘yini qoldirildi.
Mazkur bahs 3-mart, seshanba kuni, Saudiya Arabistonida o‘tkazilishi kerak edi. Biroq koronavirus sabab Saudiya Arabistoni chet elliklarga viza berishni to‘xtatib qo‘ygandi.
Izoh (0)