5−6 март кунлари ўтказилиши режалаштирилган биринчи Тошкент халқаро инвестиция форуми кузга қолдирилди, деб хабар берди «Gazeta.uz».

Фото: «Gazeta.uz»

Нашр манбасининг қайд этишича, тадбир муддатининг кўчирилишига дунёда коронавирус тарқалгани билан боғлиқ. У 12−14 февраль кунлари Сочида ўтказилиши режалаштирилган Россия инвестиция форуми ҳам худди шу сабаб билан номаълум муддатга қолдирилганини таъкидлаб ўтди.

Суҳбатдош форум Ўзбекистон учун жуда муҳим бўлгани боис албатта ўтказилишини қайд этди.

Инвестиция форумини ўтказиш ташаббуси Ўзбекистон Президенти Шавкат Мирзиёев томонидан январда парламентга мурожаат вақтида илгари сурилган эди.

Инвестициялар ва ташқи савдо вазирлиги маълумотларига кўра, форумда 1500 нафардан ортиқ хорижий ва маҳаллий компаниялар раҳбарлари, инвесторлар, экспортчилар ва халқаро ОАВ вакилларининг иштирок этиши режалаштирилган.

Маълумот учун, Хитойда янги турдаги COVID-19 коронавируси оқибатида вафот этганлар сони 2004 кишига етди, касалликни юқтириб олганларнинг жами сони эса 74 185 кишини ташкил этмоқда.

Ухандан Ўзбекистонга олиб келинган 84 киши карантиндан чиқди — уларда ҳам коронавирус аломатлари аниқланмади. Коронавирус сабаб карантинда турган Diamond Princess кемасининг йўловчилари қирғоққа чиқа бошлади.