Shavkat Mirziyoyev Toshkent xalqaro investitsiya forumini tashkil etish bo‘yicha yig‘ilish o‘tkazdi

Prezident Shavkat Mirziyoyev 27-yanvar, dushanba kuni Toshkent xalqaro investitsiya forumini yuqori saviyada tashkil etish masalasi bo‘yicha yig‘ilish o‘tkazdi, deya xabar bermoqda davlat rahbarining matbuot xizmati.

2020-yilda O‘zbekiston iqtisodiyotiga 5,8 milliard dollarlik to‘g‘ridan to‘g‘ri xorijiy investitsiyalarni jalb qilish belgilangan. Shu maqsadda mart oyida Toshkent xalqaro investitsiya forumi o‘tkazilishi rejalashtirilgan.

“Forumning asosiy maqsadi iqtisodiyot drayverlari hisoblangan energetika, mashinasozlik, elektrotexnika, axborot texnologiyalari, to‘qimachilik, qishloq xo‘jaligi va oziq-ovqat sanoati, qurilish sohalari hamda hududlarga to‘g‘ridan to‘g‘ri xorijiy investitsiyalarni jalb qilishni kengaytirishdir”, — deya xabar bermoqda Prezident matbuot xizmati.

Yig‘ilishda ushbu anjumanni yuqori saviyada tashkil etish uchun aniq tashkiliy vazifalar belgilab berilgan. Xususan, Investitsiyalar va tashqi savdo vazirligiga tarmoq va hududlar rahbarlari bilan birga xorijiy investorlarga taklif etiladigan istiqbolli loyihalar bo‘yicha taqdimot materiallari tayyorlash vazifasi qo‘yilgan.

Hududiy loyihalarni amalga oshirish uchun mahalliy ishlab chiqaruvchilar va xorijiy investorlar o‘rtasida bevosita hamkorlik o‘rnatishga alohida e’tibor qaratish kerakligi ta’kidlangan. Tashqi ishlar vazirligiga yetakchi xorijiy kompaniyalar, xalqaro moliya tashkilotlari va ommaviy axborot vositalari vakillarini forumga jalb etish bo‘yicha ko‘rsatmalar berilgan.

Anjuman o‘tkaziladigan joylarni yuqori saviyada tayyorlash, uni ommaviy axborot vositalarida keng targ‘ib etish va yoritib borish masalalariga ham to‘xtalib o‘tilgan. “Mutasaddilar forumga tayyorgarlik ishlari va erishilishi mo‘ljallanayotgan kelishuvlar haqida hisobot berdi”, — deya qo‘shimcha qilingan rasmiy axborotda.