Тошкент халқаро аэропорти йил охиригача реконструкция қилинади

Яқин 1,5—2 йил давомида Тошкент халқаро аэропортида йўловчи оқими йилига 4,5 миллиондан 7 миллионга етказилади. Бу ҳақда Uzbekistan Airports АЖ раиси Равшан Исмоилов маълум қилди, дея хабар беради Spot.

Ҳозирда компания немис мутахассислари билан аэропорт реконструкцияси лойиҳасини муҳокама қилиш, лойиҳа-смета ҳужжатларини тайёрлаш билан шуғулланмоқда. Йил охирига қадар модернизация ишларини якунлаш кўзда тутилган.

Реконструкция рўйхатга олиш устунларини икки баравар — 24 тадан 48 тага кўпайтириш, аэропорт автотураргоҳини янада қулай кўринишга келтириш ва ҳозирги битта ўрнига 8 та кириш-чиқиш йўлакларини ташкил этишни кўзда тутади.

Келгуси йили эса Тошкент—Восточний аэродроми базасида қурилаётган фуқаролик авиацияси аэропорти фойдаланишга топширилади. Икки ҳаво портини бирлаштириш ва ягона транспорт хаби сифатида ишлатиш мўлжалланган. Янги аэропорт иш бошлаши билан умумий ўтказиш имконияти йилига 10 миллион йўловчидан ошади.

«Йўловчи оқими икки аэропортнинг ўртача имкониятидан ошиб кетган тақдирда йилига 50 миллион йўловчига хизмат қиладиган замонавий аэропорт қурилиши ҳақида ўйлашимиз керак. Бу 10 йил нари-берисидаги узоқ муддатли истиқболдаги режа», — дея таъкидлади Равшан Исмоилов.

Келгусида халқаро аэропортни Тошкентдан 30-35 километр нарига, Ангрен ёки Чиноз томонга кўчириш кўзда тутилган.