Янги турдаги коронавирус ўчоғи ҳисобланган Хитойнинг Хубэй провинциясида сўнгги бир сутка давомида COVID-19 инфекцияси асоратларидан 242 киши вафот этди. Бу ҳақда ҳудудий гигиена ва соғлиқни сақлаш қўмитаси маълум қилди.
Фото: Reuters
«Умумий ҳисобда вилоятда 1310 та ўлим ҳолати қайд этилган, шундан 1036 таси Ухань шаҳрида юз берган», — дейилади қўмита ахборотида. Шундай қилиб, Хубэйда коронавирусдан вафот этиш ҳолатлари тўртдан бирга кўпайган. Аввалроқ 12 февраль куни вилоятда касалликдан 1068 киши вафот этгани ҳақида хабар берилган эди.
Қўшимча қилишларича, коронавирус инфекцияси билан касалланиш ҳолатлари ҳам кескин кўпайган — бир сутка ичида Хубэйда 14 840 та янги касалланиш ҳолати қайд этилган. Шундан 13 436 та ҳолат вилоят маъмурий маркази ҳисобланган Ухань шаҳрига тўғри келади.
Умумий ҳисобда шифокорлар 13 февраль тонги ҳолатига кўра янги турдаги коронавирус сабаб COVID-19 инфекцияси билан касалланган жами 48 206 кишини рўйхатга олган.
Хитой Миллий соғлиқни сақлаш комиссиясидан маълум қилишларича, беморлар сони билан боғлиқ статистикадаги кескин ўсиш касаллик бўйича ташхис қўйиш методикасининг ўзгариши билан боғлиқ. Бундан буён касалланган беморлар сони фақат компьютер томографияси маълумотлари асосида, бошқа текширувлар натижаларини кутмасдан туриб киритиб борилади.
Шифокорларнинг таъкидлашича, бу беморларни касалликнинг эрта босқичида даволаб бориш имконини беради. Маълумот учун, Хитой бўйича касалланганлар сони салкам 60 минг кишига етган, қурбонлар сони 1,3 минг кишидан ошиб кетган. 5,6 мингдан зиёд бемор эса касалликдан тузалишга муваффақ бўлган.
Айни вақтда эпидемия бошланганидан бери 3 441 нафар бемор даволаниб, уйига жавоб берилган — сўнгги бир сутка давомида даволаниб бўлганлар сони 802 кишига кўпайган. Ҳозирда 33 693 киши ҳали ҳам даволанишда қолмоқда, улардан 5 647 нафарининг аҳволи жуда оғир.
Мавзуга доир: Фотогалерея: Хитой коронавирус тарқалгунича қандай яшаган ва ундан кейин қандай яшамоқда?
Куни кеча Гонконг расмийлари коронавирус канализация қувурлари орқали ҳам тарқалиши мумкинлигини тахмин қилди. Ушбу тахмин Хитойга сафар қилмаган ва беморлар билан мулоқотда бўлмаган аёл коронавирусни юқтириб олганидан сўнг пайдо бўлган. Қайд этишларича, бир ҳафта аввал аёлнинг 75 ёшли қўшниси COVID-19 вируси билан шифохонага ётқизилган. Аёл бу қўшниси билан ҳеч кўришмаган, аммо уларнинг хонадонлари умумий канализация қувури билан бир-бирига уланган бўлган.
