Хитойнинг Вашингтондаги элчиси Цуй Тянькай янги турдаги коронавирус биологик қуроллар ишлаб чиқариш йўлида пайдо бўлганлиги ҳақидаги барча фаразларни «мутлақо аҳмоқона» деб атади. Бу ҳақда CBS News телеканали хабар берди.
Фото: News.CN
«Гумон, миш-мишларни қўзғатиш ҳамда уларни одамлар орасида тарқатиш жуда зарарли ва хавфлидир. Биринчидан, бу ваҳима уйғотади. Бундан ташқари, ирқий камситишларга олиб келиши, биргаликда вирусга қарши кураш йўлида олиб бораётган ҳамкорлигимизга путур етказиши мумкин», — дейди дипломат. Шу билан бирга, Цуй Тянькай янги турдаги коронавирус Хитой ёки АҚШдаги ҳарбий лабораториядаги яратилгани ҳақидаги фаразларни «аҳмоқона» деб атаган.
Элчининг таъкидлашича, янги турдаги коронавируснинг пайдо бўлиш сабаблари ҳамон номаълумлигича қолмоқда, бироқ турли давлат олимлар бунинг устида иш олиб бормоқда. Дастлабки маълумотларга кўра, вирус ҳайвонлардан тарқалган.
Шу орқали Цуй Тянькай «Уханда дунёдаги энг хавфли патоген микроорганизмлар, шу жумладан, коронавирус билан ишлайдиган Хитойдаги ягона тўртинчи даражали биохавфсизлик супер лабораторияси мавжудлиги» ҳақида гапирган республикачи сенатор Том Коттонга жавоб қайтарган.
Мавзуга доир:
Сўнгги маълумотларга кўра, Хитойда янги турдаги коронавирус қурбонлари сони 908 кишига етган. Ҳозирга қадар Хитой коронавирусга қарши кураш учун 10 миллиард доллардан ортиқ маблағ сарфлаб юборди.
