Amenity Analytics компанияси янги турдаги коронавируснинг молиявий ва иқтисодий кўрсаткичларга таъсирини кузатиб борувчи тизимни ишга туширди, деб хабар берди «РБК».
Тизим компанияларнинг ушбу вирус тилга олинган баёнот ва ҳисоботларини таҳлил қилади.
Маълум қилинишича, 421 та компания жорий йилнинг биринчи чорагидаги даромадлари тўғрисидаги ҳисоботларида Хитойда тарқалган коронавирус молиявий натижаларга салбий таъсир кўрсатиши мумкинлигини билдирган. Бу компанияларнинг 394 таси АҚШда жойлашган.
Коронавируснинг салбий таъсири ҳақида энг кўп хавотир Хитойдаги йирик тезкор овқатланиш тармоғи бўлган Yum China корпорацияси томонидан билдирилган. Унинг бошқарувида KFC, Pizza Hut ва Taco Bell каби брендларга қарашли ресторанлар мавжуд.
Мода соҳасида эса Louis Vuitton Moët Hennessy (LVMH), Capri Holdings ва Estee Lauder каби компаниялар вируснинг салбий таъсири ҳақида сўз юритган.
Шунингдек, коронавируснинг биринчи чоракдаги салбий таъсири тўғрисида Apple, Nike, Starbucks, McDonald’s каби йирик компаниялар ҳам маълум қилган.
Маълумот учун, Хитойда коронавирус қурбонлари сони 800 нафардан ошиб кетди.
Изоҳ (0)