Россиянинг Санкт-Петербург шаҳрида Lite-Mobile интернет-дўконида курер бўлиб ишловчи Ўзбекистон фуқаросини тўнаб кетишди, деб хабар беради «Фонтанка».
Ўзбекистонлик 40 ёшли эркак ҳодиса ҳақида ҳуқуқ-тартибот органларига 30 январь куни кечаси соат 22:00 лар атрофида хабар берган.
У Коммунарлар кўчасида яшовчи мижозга иккита 256 ва 512 гегабайт хотирага эга тилларанг iPhone 11 Pro Мах смартфонларини олиб келган. Мижозга қўнғироқ қилиб, Lada Largus автомобилидан унинг олдига тушганида эса ёнига Audi автомашинаси келиб тўхтаган. Audi’дан иккита соқолли эркак тушиб, Ўзбекистон фуқаросига газ баллончадан газ пуркаган. Қўрқиб кетган ўзбекистонлик эркак иккита смартфонни маҳкам ушлаб қочган. Лекин «соқоллилар» унинг ортидан етиб бориб, йиқитиб, томоғига пичоқ тираб, телефонларни олиб кетган.
Ўзбекистон фуқароси Lada Largus автомобилига келганида, машинанинг ойнасини синдириб, унинг ичидан турли русумли яна 11 та телефонни олиб кетишганини пайқаган.
Жабрланувчининг айтишича, унга бўйи унчалик баланд бўлмаган эркаклар ҳужум қилган. Audi рулида эса сариқ сочли эркак бўлган.
Интернет-дўкон кўрган зарар 400 минг рубль (6300 доллар атрофида) деб баҳоланмоқда.
Изоҳ (0)