Косон тумани халқ таълими бўлими раҳбари Соиб Давидов 98-мактабда бўш иш ўрни бўлмаганлигини, директор фуқарони кимнинг ўрнига ишга олмоқчи бўлганлиги савол остида қолаётганини таъкидлади. Бу ҳақда Косон туман ҳокимлигида бўлиб ўтган матбуот анжуманида маълум қилинди, дея хабар беради «Дарё» мухбири.
— Мактаб директори ўз манфаатини жамият манфаатидан устун қўйган. Шу сабаб ҳам у шундай хатога йўл қўйган. Аслида ўша мактабда бўш иш ўрни бўлмаган, у фуқарони кимнинг ўрнига ишга олмоқчи бўлгани очиқ қоляпти, — дейди Соиб Давидов.
Маълум қилинишича, Косон туманидаги 98-мактаб директори вилоятда пора билан қўлга олинган иккинчи мактаб раҳбари ҳисобланади.
— 2019 йил Касби туманидаги 35-мактаб директори пора билан қўлга тушганди, жорий йил эса бу ҳолат кузатилди, — деди вилоят халқ таълими бошқармаси бошлиғи ўринбосари Тўра Саидов. — Бу халқ таълими бўлими мактаб директорларининг фаолиятига етарли даражада эътибор бермаётганидан дарак беради.
Эслатиб ўтамиз, вилоят раҳбари Зоир Мирзаев мактаб директорининг пора билан қўлга тушганига Косон туман халқ таълими бўлими изоҳ беришини, матбуот анжумани ташкил этиб, ОАВга маълумот бериши лозимлигини таъкидлаганди.
Изоҳ (0)