«Озодлик» радиосининг ижтимоий тармоқдаги саҳифаларида «Ҳозирча махфий: тақиқланган диний адабиёт, сайт ва ташкилотларнинг янги рўйхати тасдиқланди» номли мақола эълон қилинди. Дин ишлари бўйича қўмита матбуот хизмати мазкур мақолага муносабат билдирди.
Вазирлар Маҳкамасининг 2014 йил 20 январдаги «Диний мазмундаги материалларни тайёрлаш, олиб кириш ва тарқатиш соҳасидаги фаолиятни амалга ошириш тартибини такомиллаштириш чора-тадбирлари тўғрисида»ги 10-сон қарори асосида тасдиқланган низомда: «Ваколатли орган йилига камида икки марта манфаатдор вазирликлар ва идораларга Ўзбекистон Республикаси ҳудудида тайёрлаш, олиб кириш ва тарқатиш тақиқланган материаллар рўйхатини тақдим этади», дейилган.
Шунга кўра, ваколатли орган, яъни Дин ишлари бўйича қўмита томонидан йилига камида икки марта манфаатдор вазирликлар ва идораларга Ўзбекистон Республикаси ҳудудида тайёрлаш, олиб кириш ва тарқатиш тақиқланган материаллар рўйхати тақдим этилади. Бу 2014 йилдан буён амалда бўлиб келаётган ҳуқуқий жараён.
Давлат диншунослик экспертизаси Вазирлар Маҳкамасининг 2014 йил 20 январдаги 10-сонли қарорига мувофиқ, ваколатли орган бўлган Дин ишлари бўйича қўмита томонидан амалга оширилади. Мазкур қарорда Ўзбекистон Республикаси ҳудудига четдан олиб кириладиган ҳамда республика ҳудудида ишлаб чиқариладиган диний мазмундаги материаллар давлат диншунослик экспертизасидан ўтказилиши лозимлиги белгилаб қўйилган.
Дин ишлари бўйича қўмита эксперт-мутахассислари томонидан амалга ошириладиган давлат диншунослик экспертизаси амалиёти ўзида хориждан олиб кирилаётган ва мамлакатда тайёрланадиган диний материалларда соф диний ақидалардан оғишганлик, дин асосларини нотўғри талқин этиш, динлараро адоват ва нафрат қўзғатиш каби номақбул мақсадларда фойдаланиш ва илмий асосга эга бўлмаган маълумот ва талқинларга йўл қўйилмаслигини таъминлашни ифода этади.
Мутахассислар томонидан ҳар бир тадқиқот объектига нисбатан холис ва илмий асосланганлик нуқтаи назардан ёндашилиб, ҳар бир хулоса материалнинг мазмунидан келиб чиққан ҳолда шаффоф тарзда тайёрланади.
Шунингдек, амалиётда тақдим этилиши лозим бўлган ушбу рўйхат «махфий» эмас, балки хизмат доирасида фойдаланиладиган ҳужжат ҳисобланади.
«Бу каби хабарларни тарқатишдан олдин ҳуқуқий манбаларни синчковлик билан ўқиб чиқиш мақсадга мувофиқ эканини айтиб ўтмоқчимиз», — дейилади муносабатда.
Изоҳ (0)