Ўзбекистонда меҳнатга маъмурий тарзда мажбурлаганлик ва вояга етмаганлар меҳнатидан хавфли ишларда фойдаланганлик учун жиноий жавобгарлик жорий қилди. Жиноят кодексига мазкур ўзгартишларни киритишни назарда тутувчи қонун Ўзбекистон Президенти томонидан имзоланди. Бу ҳақда Сенат томонидан маълум қилинди.
Ўзбекистон Республикаси Жиноят кодексига киритилаётган 148-1-моддасига кўра, вояга етмаган шахснинг меҳнатидан унинг соғлиғи, хавфсизлигига зарар етказиши мумкин бўлган хавфли ишларда фойдаланиш шундай қилмиш учун маъмурий чора қўлланганидан кейин содир этилса, базавий ҳисоблаш катталигининг 25 баробари миқдорида жаримага тортишга ёки маълум ҳуқуқдан 3 йилгача маҳрум этишга ёки 3 йилгача ахлоқ тузатиш ишларига сабаб бўлади.
Айни пайтда қонунчиликда биринчи ҳолатдан кейин бир йил ичида вояга етмаган шахснинг меҳнатидан такрорий фойдаланганлик учун базавий ҳисоблаш катталигининг 20 бараваридан 30 бараваригача миқдорида жарима назарда тутилган.
Шунингдек, кодексга киритилаётган 148-2-моддага кўра, қонунда назарда тутилган ҳолатлардан ташқари, меҳнатга ҳар қандай шаклда маъмурий мажбурлаш шундай қилмиш учун маъмурий чора қўлланилганидан кейин содир этилса, базавий ҳисоблаш катталигининг 100 бараваридан 150 бараваригача миқдорда жарима билан жазолашга ёки маълум ҳуқуқдан 3 йилгача маҳрум этишга ёки 2 йилгача ахлоқ тузатиш ишларига сабаб бўлади.
Шундай ҳаракат вояга етмаган шахсга нисбатан, шундай ҳаракат учун маъмурий чора қўлланилганидан кейин содир этилса, базавий ҳисоблаш катталигининг 150 бараваридан 200 бараваригача жарима билан жазоланади ёки маълум ҳуқуқдан 3 йилгача маҳрум қилишга ёки 3 йилгача ахлоқ тузатиш ишлари тайинланишига олиб келади.
Қонунга мувофиқ, Маъмурий жавобгарлик тўғрисидаги кодексга ҳам ўзгартишлар киритилган. Унга кўра, қонунда назарда тутилган ҳолатлардан ташқари, меҳнатга ҳар қандай шаклда маъмурий мажбурлаш учун жарима миқдори базавий ҳисоблаш катталигининг 50 бараваридан 60 бараваригача этиб белгиланди. Амалдаги жарима миқдори базавий ҳисоблаш катталигининг 10 бараваридан 30 барваригачани ташкил қилади.
Шу ҳуқуқбузарлик вояга етмаган шахсга нисбатан амалга оширилса. базавий ҳисоблаш катталигининг 70 бараваридан 100 бараваригача миқдорда жарима билан жазоланади.
Мазкур ўзгаришлар қонун расман эълон қилинган 23 январдан уч ой ўтгач кучга киради.
Изоҳ (0)