Танзила Норбоева Сенатнинг Регламент ва одоб комиссияси ҳеч қачон ишламаслигини хоҳламоқда. Сенат раиси бу ҳақда янги сайланган парламент юқори палатасининг 20 январь, душанба куни бўлиб ўтган биринчи ялпи мажлисида айтиб ўтди, дея хабар бермоқда «Дарё» мухбири Мусулмонбек Иброҳимов.
Сенат раиси Танзила Норбоева ўз чиқишида сенаторлардан Президент Шавкат Мирзиёевнинг кўрсатмаларига асосан олиб борилаётган ишларни одамларнинг шаънига тегмай амалга оширишни илтимос қилди.
Президентимиз жуда катта, кучли жамоа йиғган. Вилоят, туман ва шаҳар ҳокимлари — ҳаммангиз катта иш қиляпсиз. Лекин битта ноўрин қилган ҳаракатимиз қилган ҳамма ишларимизга доғ тушуриб қўйиши мумкин.Маълумот учун, «Ўзбекистон Республикаси Олий Мажлиси Қонунчилик палатаси депутатининг ва Сенати аъзосининг мақоми тўғрисида»ги қонуннинг 11-моддасига мувофиқ, депутат ва сенатор одоб қоидаларига қатъий риоя этиши лозим. Қоидалар бузилган тақдирда, депутат ва сенаторнинг хулқ-атвори тўғрисидаги масала тегишли палата томонидан ёки унинг топшириғига биноан палатанинг органи томонидан кўриб чиқилиши мумкин. Шу муносабат билан, «Ўзбекистон Республикаси Олий Мажлиси Сенатининг Регламенти тўғрисида»ги қонуннинг 8-моддасига мувофиқ, Сенатда Регламент ва одоб комиссияси тузилган.Халқимиз кечаги эмас — бизга, вакилига қатъий талаб қўймоқда. «Регламент ва одоб комиссияси нима учун кўрмаяпти, нима учун чора кўрмаяпсизлар?», деган масала қўйиладиган бўлса, биз кўриб чиқишга ва давлат раҳбарига ҳам ахборот киритишга мажбур бўламиз.
Шунинг учун сизлардан жуда ҳам илтимос қиламан — одоб ва тартибни бузмаган ҳолда, давлатимиз раҳбари олиб бораётган ишларни жуда чиройли қилиб амалга оширишларингни хоҳлардим; албатта, қаттиққўллик керак, лекин инсон шаънига тегмасдан амалга ошириш керак.
Танзила Норбоева, Ўзбекистон Сенати раиси
Қайд этиш жоиз, 2019 йил сентябрида Сенатнинг Регламент ва одоб комиссияси Фарғона вилояти ҳокими, сенатор Шуҳрат Ғаниевнинг соқол қўйганлар, рўмол ўраганлар ва иш жойида намоз ўқиганларга қилган таҳдидини муҳокама қилган эди. Ўшанда ҳоким «ўтиниб-ўтиниб кечирим сўраган», Сенат уни қаттиқ огоҳлантириб, уч ой синов муддати берганди. Орадан икки ой ўтиб, Шуҳрат Ғаниев яна фуқароларга таҳдид қилгани расман исботланди, бироқ бу сафар Сенат Фарғона вилояти ҳокимининг ушбу хатти-ҳаракатларига муносабат билдирмади.
Изоҳ (0)