Шавкат Мирзиёев: Ёқилғи-энергетика соҳаси коррупция ботқоғига ботиб кетган

Ўзбекистон ёқилғи-энергетика соҳасида ҳали ҳам «дастлабки қадамларни қўя олмаяпти». Ўзбекистон транспорт, қурилиш ва ичимлик суви таъминоти соҳаларида аҳвол яхши эмас. Бу ҳақда Президент Шавкат Мирзиёев 21 январь куни Олий Мажлис палаталарининг қўшма мажлисидаги чиқишида таъкидлаб ўтди, дея хабар бермоқда «Дарё» мухбири Миролим Исажонов.

Ёқилғи-энергетика соҳаси — энг оғир масала. Бу соҳада ҳали дастлабки қадамларни ҳам қўёлмаяпмиз. Бу соҳаларда коррупция, порахўрлик жуда кўп — йиллар давомида коррупция ботқоғига ботиб кетган.

Геология билан охирги 25 йил давомида ҳеч ким шуғулланмади. Бор илмий салоҳиятни ҳам йўқ қилдик. Геологиясиз саноатни ривожлантириб бўлмайди. Бу тизимда кадрлар ҳам йўқ. «Яхши геологлар борми? Илмий гуруҳлар борми? Академиклар борми? Шу соҳа бўйича кадрлар тайёрлайдиган муассаса борми?», дейилса, «йўқ» деб жавоб бераман.

Шавкат Мирзиёев, Ўзбекистон Президенти

Қайд этиш жоиз, Президент 20 январь куни Сенатнинг биринчи ялпи мажлисидаги маърузасида ҳам геология соҳасидаги муаммолар ҳақида тўхталиб ўтган эди.

«Геологияга охирги 20 йилда 2 миллиард сўм бермаганмиз. Мен уларга 2 триллион сўм беряпман. Мен ҳали сизларга кўп нарсаларни айтолмайман. Бизнинг ер ости бойликларимиз жуда кўп. Лекин унга нима керак? Мутахассис, геолог керак. Геолог йўқ бизда», — деганди Шавкат Мирзиёев 20 январдаги тадбирда.

Шунингдек, давлат раҳбари «СССР вақтида Ўзбекистон геология бўйича ҳаммага ўрнак» бўлганини ҳам қўшимча қилганди. «Ҳаммага намуна эди. Қандай музейларимиз бор эди геология бўйича. Қандай академикларимиз бор эди, у академикларнинг мактаби бор эди. Қани у мактаблар?», — дея савол қўйганди Президент.