«Навоийазот»да қурилаётган азот кислотаси ишлаб чиқарувчи мажмуасининг қурилиш-монтаж ишлари якунланди, у февраль ойида ишга туширилади. Бу ҳақда Ахборот ва оммавий коммуникациялар агентлигида «Ўзкимёсаноат» акциядорлик жамияти томонидан бугун, 17 январь куни ўтказилган матбуот анжуманида маълум қилинди.
Умумий қиймати 217 миллион долларга тенг ушбу объект Швейцариянинг Casale Sa компанияси билан ҳамкорликда бунёд этилмоқда. Бу корхона йилига 500 минг тонна маҳсулот тайёрлаш қувватига эга бўлади.
Шу тариқа 55 йил олдин қурилган, ҳар томонлама эскирган азот кислотаси цехлари фойдаланишдан чиқарилади. Энг муҳими, 1 тонна маҳсулот ишлаб чиқариш учун электр энергияси сарфи 18 баробар камаяди, ҳавони ифлослантирадиган 150 минг тонна миқдоридаги нитроз газлари тутиб қолинади.
Эслатиб ўтамиз, Ўзбекистон Президенти Шавкат Мирзиёев 28 декабрь куни «Навоийазот»да барпо этилаётган ушбу корхона қурилишини бориб кўрган ҳамда барпо этилаётган мажмуа Навоий вилояти экологияси, ҳаво мусаффолиги, аҳоли саломатлиги учун ғоят муҳимлигини алоҳида таъкидлаганди.
Изоҳ (0)