Наманганда 2020 йил 14 январь куни юз берган аварияда вилоят ҳокимининг собиқ ўринбосари Манзурахон Азизова ҳалок бўлган. Бу ҳақда «Дарё» мухбири хабар берди.
Шу куни соат 08:20 атрофида «Наманган—Учқўрғон» автомобиль йўлининг 22-километрида, Уйчи туманидаги Олмуруд маҳалласи ҳудудида Nexia русумли автомобилни бошқариб кетаётган ҳайдовчи қувиб ўтиш қоидасини қўпол равишда бузиб, йўлнинг қарама-қарши йўналишига чиқиб кетган. Уйчи туман ИИБ йўл ҳаракати хавфсизлиги гуруҳи катта инспектори Адҳамжон Бурҳанов ушбу маълумотни тасдиқлаган.
Бунинг оқибатида Nexia автомобили 30 нафар йўловчиси бўлган, Учқўрғон—Наманган йўналишида ҳаракатланиб келаётган Isuzu автобуси билан тўқнашган. ЙТҲ оқибатида Nexia салонида бўлган Манзурахон Азизова воқеа жойида ҳаётдан кўз юмган.
Шунингдек, Nexia ҳайдовчиси ҳамда икки нафар йўловчи олган тан жароҳатлари билан шифохонага ётқизилган.
Isuzu автобусининг 11 нафар йўловчисига касалхонада тиббий ёрдам кўрсатилиб, уйларига жавоб берилган. Мазкур ҳолат юзасидан тезкор-тергов ишлари олиб борилмоқда.
Манзурахон Азизова 2009—2015 йилларда Наманган вилоят ҳокимининг ўринбосари — Хотин-қизлар қўмитаси раиси лавозимида фаолият кўрсатган. 2017 йилдан Учқўрғон туманидаги кўп тармоқли марказий поликлиника бош шифокори лавозимида ишлаб келаётган эди.
«Манзурахон Азизова бу йил 60 ёшни қаршилаган эди. У моҳир шифокор, тажрибали раҳбар сифатида юзлаб шогирдларни тарбиялади. Ишлаганда ҳам бор салоҳиятини сафарбар этиб, ўта фидойилик билан ишлай олди. Одамларга очиқ юз ва хушмуомалада бўлди.
Вилоят ҳокимлиги Манзурахон Азизова оила аъзолари, фарзандлари, шогирдлари, бутун Наманган халқига ҳамдардлик билдиради», — дейилади Наманган вилояти ҳокимлиги сайтида жойлаштирилган таъзияда.
Изоҳ (0)