Қашқадарёлик тадбиркор Қарши шаҳар прокурори Актам Наврўзовнинг устидан шикоят қилиб, уни зўравонликда айблаганди. Бош прокуратура ахборот хизмати раҳбари Ҳаёт Шамсутдиновнинг «Дарё»га маълумот беришича, «Три пальма» ресторани раҳбари Ўткир Остонов ва ишчилари иштирокида ҳолат ўрганилганда компьютер техникаси (ноутбук) шаҳар прокурори Актам Наврўзов томонидан синдирилмаганлиги маълум бўлган. Айтилишича, айбдор бошқа одам.
2020 йил 5 январь куни Қарши шаҳар ҳокимлиги мутасадди ташкилотлар билан ҳамкорликда жамоат тартибини сақлаш ва жиноятчиликнинг олдини олиш мақсадида қўшма қарор имзолаган.
— Қарор ижросини таъминлаш мақсадида 2020 йил 5 январдан бошлаб Қарши шаҳар прокурори, Миллий гвардия ва ИИБ ходимлари, Қарши шаҳар маҳаллалар жамғармасининг биринчи ўринбосари, нуроний оқсоқоллар билан биргаликда Қарши шаҳридаги тунги вақтда спиртли ичимликлар савдоси билан шуғулланиб фаолият юритувчи «Москов», «Рубаи», «Мажор», «Олтин хўрозча», «Лиден», «Баҳор», «Халифа», «Жейнов оқшоми», «Достон», «Сарбон» ва бошқа тунги клуб, кафе ва ресторанларга «тунги рейдлар» уюштирилган, — дейилади Бош прокуратура ахборот хизмати хабарномасида. — 2020 йил 11 январь куни ўтказилган тунги рейд давомида соат 23:00 лар атрофида «Три пальма» ресторанига борилиб, шу ерда бўлган шахси ноаниқ ва шубҳа уйғотган фуқароларнинг шахсини аниқлаш ҳамда профилактик тадбир ўтказиш учун Қарши шаҳар ИИБ биносига олиб келинган.
Маълум қилинишича, тадбиркор ресторанидаги кузатув камераларининг хотираси 2019 йил 13 декабрь куни «Три пальма» ресторанида содир этилган жиноят ишини ойдинлаштириш мақсадида баённома расмийлаштириб олинган.
Аниқланишича, ўша куни ресторанда фуқаро Л.Рўзиев маст ҳолатда Н.Норматов билан ўзаро жанжаллашиб, унга оғир тан жароҳати етказган. Мазкур ҳолат юзасидан Қарши шаҳар 2-сонли ИИБ ҳузуридаги ТБ томонидан Жиноят кодексининг 104-моддаси 1-қисми билан жиноят иши қўзғатилган.
Ҳозирда мақолада келтирилган ҳолатларнинг ҳаққонийлигига аниқлик киритиш мақсадида Қашқадарё вилояти прокуратураси томонидан терговга қадар текшириш ҳаракатлари олиб борилмоқда.
Изоҳ (0)