Qashqadaryolik tadbirkor Qarshi shahar prokurori Aktam Navro‘zovning ustidan shikoyat qilib, uni zo‘ravonlikda ayblagandi. Bosh prokuratura axborot xizmati rahbari Hayot Shamsutdinovning “Daryo”ga ma’lumot berishicha, “Tri palma” restorani rahbari O‘tkir Ostonov va ishchilari ishtirokida holat o‘rganilganda kompyuter texnikasi (noutbuk) shahar prokurori Aktam Navro‘zov tomonidan sindirilmaganligi ma’lum bo‘lgan. Aytilishicha, aybdor boshqa odam.
2020-yil 5-yanvar kuni Qarshi shahar hokimligi mutasaddi tashkilotlar bilan hamkorlikda jamoat tartibini saqlash va jinoyatchilikning oldini olish maqsadida qo‘shma qaror imzolagan.
— Qaror ijrosini ta’minlash maqsadida 2020-yil 5-yanvardan boshlab Qarshi shahar prokurori, Milliy gvardiya va IIB xodimlari, Qarshi shahar mahallalar jamg‘armasining birinchi o‘rinbosari, nuroniy oqsoqollar bilan birgalikda Qarshi shahridagi tungi vaqtda spirtli ichimliklar savdosi bilan shug‘ullanib faoliyat yurituvchi “Moskov”, “Rubai”, “Major”, “Oltin xo‘rozcha”, “Liden”, “Bahor”, “Xalifa”, “Jeynov oqshomi”, “Doston”, “Sarbon” va boshqa tungi klub, kafe va restoranlarga “tungi reydlar” uyushtirilgan, — deyiladi Bosh prokuratura axborot xizmati xabarnomasida. — 2020-yil 11-yanvar kuni o‘tkazilgan tungi reyd davomida soat 23:00 lar atrofida “Tri palma” restoraniga borilib, shu yerda bo‘lgan shaxsi noaniq va shubha uyg‘otgan fuqarolarning shaxsini aniqlash hamda profilaktik tadbir o‘tkazish uchun Qarshi shahar IIB binosiga olib kelingan.
Ma’lum qilinishicha, tadbirkor restoranidagi kuzatuv kameralarining xotirasi 2019-yil 13-dekabr kuni “Tri palma” restoranida sodir etilgan jinoyat ishini oydinlashtirish maqsadida bayonnoma rasmiylashtirib olingan.
Aniqlanishicha, o‘sha kuni restoranda fuqaro L.Ro‘ziyev mast holatda N.Normatov bilan o‘zaro janjallashib, unga og‘ir tan jarohati yetkazgan. Mazkur holat yuzasidan Qarshi shahar 2-sonli IIB huzuridagi TB tomonidan Jinoyat kodeksining 104-moddasi 1-qismi bilan jinoyat ishi qo‘zg‘atilgan.
Hozirda maqolada keltirilgan holatlarning haqqoniyligiga aniqlik kiritish maqsadida Qashqadaryo viloyati prokuraturasi tomonidan tergovga qadar tekshirish harakatlari olib borilmoqda.
Izoh (0)