Агробанк АТБ Хитой давлат тараққиёт банки (ХДТБ) билан 40 миллион долларлик кредит шартномасини имзолади. Имзолаш маросимида Хитой давлат тараққиёт банкининг Ўзбекистондаги ишчи гуруҳи директори жаноб Фенг Же, Хитой давлат ривожланиш банкининг лойиҳа менежери Ванг Шаонан ва Агробанк АТБ бошқарув раисининг ўринбосари Шуҳрат Мирзаев иштирок этишди.
— Кредит шартномаси Ўзбекистон ва Хитой Халқ Республикаси ишбилармонлари ўртасидаги муносабатларни узоқ муддатли кредитлар бериш орқали қўллаб-қувватлашни, иқтисодий ва савдо алоқаларини кенгайтиришни, шунингдек, икки стратегик шерик мамлакатнинг инвестицион фаолиятини таъминлашни кўзда тутади, — деди Шуҳрат Мирзаев.
Шартнома Хитой етказиб берувчилари ва пудратчилари иштирокидаги лойиҳаларни молиялаштириш учун кредит линиясини тақдим этишга тааллуқлидир. Ушбу битимнинг мақсади Хитойдан юқори технологик ускуналар, товарлар ва хизматларни сотиб олишни молиялаштириш орқали ўзбекистонлик ишбилармонлар ва Хитой ишлаб чиқарувчилари ўртасидаги ҳамкорликни ривожлантиришга кўмаклашиш.
Молиявий ҳамкорлик тўғрисидаги шартноманинг имзоланиши икки томонлама муносабатларга ва икки мамлакат ўртасидаги савдо-иқтисодий алоқаларнинг янада ривожланишига туртки бўлади, шунингдек, кредит ресурсларини имтиёзли шартларда жалб қилиш имкониятини беради. Бу эса Ўзбекистонда янги йирик инвестиция имкониятларини яратади.
Маълумот ўрнида айтиш мумкинки, Хитой давлат тараққиёт банки (CДБ) 1994 йил март ойида инфратузилмани, йирик саноат тармоқларини, шу жумладан, энергетика ва транспортни модернизация қилиш ва ривожлантиришга йўналтирилган ҳукумат лойиҳаларини молиялаштириш учун ташкил этилган. Хитой молия институтининг асосий мақсади иқтисодиётни ривожлантириш ва стратегик таркибий ўзгаришларни қўллаб-қувватлаб, марказий ҳукуматнинг макроиқтисодий сиёсатини тартибга солишдир. CДБнинг асосий фаолияти узоқ муддатли кредитлаш ва облигациялар чиқариш ҳисобланади.
Агробанк матбуот хизмати.
Сайт: www.agrobank.uz
Реклама ҳуқуқи асосида.
Изоҳ (0)