Россиянинг АҚШдаги элчихонаси компьютер тизимини, шу жумладан хавфсизлик тизимини ишга тушира олмаяпти. Россия Ташқи ишлар вазирлиги томонидан маълум қилинишича, бунга Россияга қарши жорий қилинган санкциялар сабаб бўлмоқда. Санкциялар сабабли керакли ходимлар АҚШга кира олмаяпти. Бу ҳақда TJournal хабар берди.
Россия ташқи ишлар вазири ўринбосари Евгений Ивановнинг маълум қилишича, элчихона учун керакли компьютерлар харид қилинган ва етказиб берилган, бироқ тизимни ўрнатиш учун керак бўлган техник мутахассислар АҚШга бора олмаяпти. Муаммони ечиш учун Россия Ташқи ишлар вазирлиги Давлат думасига мазкур ходимларга хизмат паспорти беришни кўзда тутувчи қонун лойиҳасини киритган.
Қонун лойиҳаси Россия ҳукуматининг мамлакат ташқарисидаги мулкини бошқарувчи, уларни сақлаб турувчи ва улардан фойдаланувчи мутахассисларга қаратилган. Шунингдек, ўзгаришлар шартнома асосида элчихоналар ва консулликларга хизмат сафарига борадиган пудратчи дипломатларга ҳам тааллуқли бўлади. Ивановнинг қайд этишича, бундай мутахассислар кўпроқ хавфсизлик, алоқа ва капитал қурилиш бошқармалари учун зарур ҳисобланади.
Қонун қабул қилинса, барча мутахассислар хизмат паспортини олади. Паспортни фақат давлат шартномаси муддатига, бироқ беш йилдан кўп бўлмаган муддатга бериш режалаштирилмоқда.
Вазир ўринбосарининг сўзларига кўра, сўнгги 20 йил давомида бундай ходимлар хорижга оддий паспорт билан борган ва муаммолар бўлмаган. Бироқ санкциялар жорий қилиниши билан АҚШ, Канада, Буюк Британия ва Евроиттифоқ Россия элчихоналарининг техник ходимларига оддий паспорт билан виза бериш жараёнини мураккаблаштирди.
Изоҳ (0)