Ўзбекистон савдо-саноат палатаси «Ўзбекистон Республикаси савдо-саноат палатаси тўғрисида»ги қонунига ўзгартириш ва қўшимчалар киритиш тўғрисидаги қонун лойиҳасини муҳокамага қўйди.
Лойиҳада мазкур ташкилотга аъзолик тартибини ўзгартириш таклиф этилган.
Ҳозирда палатага аъзолик кичик бизнес субъектлари ва хусусий тадбиркорлар учун ихтиёрий, бошқа тадбиркорлик субъектлари учун мажбурий ҳисобланади.
Лойиҳада бунга ўзгартириш киритиш ва фақатгина кичик тадбиркорлик билан шуғулланувчиларга ихтиёрий, қолган барчага мажбурий қилиш таклиф этилмоқда.
Қонун лойиҳаси муаллифларининг таъкидлашича, 2018 йил ноябрда кучга кирган «Савдо-саноат палатаси тўғрисида»ги қонуннинг янги таҳрири сабаб йирик компанияларнинг палатага аъзо бўлишида муаммолар юзага келган.
«Ўзини хусусий деб ҳисоблаган йирик компаниялар мажбурий аъзолик тўғрисидаги шартномани тузишдан бош тортгани ҳақида 827 та мурожаат келиб тушган», — дейилади хабарда.
Савдо-саноат палатасидагиларнинг айтишича, бу каби муаммолар қонунчиликда «хусусий тадбиркорлик»ни аниқловчи аниқ механизм йўқлиги сабаб юзага келмоқда. Шу сабабли фақат кичик тадбиркорларни қолдириб, қолганларга мажбурий қилиш таклиф этилган. Лойиҳа 28 январга қадар муҳокамада бўлади.
Изоҳ (0)