O‘zbekiston savdo-sanoat palatasi “O‘zbekiston Respublikasi savdo-sanoat palatasi to‘g‘risida”gi qonuniga o‘zgartirish va qo‘shimchalar kiritish to‘g‘risidagi qonun loyihasini muhokamaga qo‘ydi.
Loyihada mazkur tashkilotga a’zolik tartibini o‘zgartirish taklif etilgan.
Hozirda palataga a’zolik kichik biznes subyektlari va xususiy tadbirkorlar uchun ixtiyoriy, boshqa tadbirkorlik subyektlari uchun majburiy hisoblanadi.
Loyihada bunga o‘zgartirish kiritish va faqatgina kichik tadbirkorlik bilan shug‘ullanuvchilarga ixtiyoriy, qolgan barchaga majburiy qilish taklif etilmoqda.
Qonun loyihasi mualliflarining ta’kidlashicha, 2018-yil noyabrda kuchga kirgan “Savdo-sanoat palatasi to‘g‘risida”gi qonunning yangi tahriri sabab yirik kompaniyalarning palataga a’zo bo‘lishida muammolar yuzaga kelgan.
“O‘zini xususiy deb hisoblagan yirik kompaniyalar majburiy a’zolik to‘g‘risidagi shartnomani tuzishdan bosh tortgani haqida 827 ta murojaat kelib tushgan”, — deyiladi xabarda.
Savdo-sanoat palatasidagilarning aytishicha, bu kabi muammolar qonunchilikda “xususiy tadbirkorlik”ni aniqlovchi aniq mexanizm yo‘qligi sabab yuzaga kelmoqda. Shu sababli faqat kichik tadbirkorlarni qoldirib, qolganlarga majburiy qilish taklif etilgan. Loyiha 28-yanvarga qadar muhokamada bo‘ladi.
Izoh (0)