15 январь, чоршанба куни оммавий ахборот воситалари учун «ЎзРTХБда биржа савдолари ва электрон тижоратнинг ривожланиш натижалари ва истиқболлари» мавзусида матбуот анжумани бўлиб ўтди. Бу ҳақда ЎзРTХБ матбуот хизмати «Дарё»га хабар берди.
Қайд этилишича, ўтган йилда биринчи навбатда биржа савдоларида сотилаётган товарларнинг сони ва ҳажмининг кўпайиши эвазига тадбиркорлар томонидан юқори ликвидли ва монопол маҳсулотлотларидан эркин фойдаланиши имкониятлари янада кенгайтирилди. Натижада кичик бизнес ва хусусий тадбиркорлик субъектлари иштирокида тузилган шартномаларнинг ҳажми 2018 йилга нисбатан 31 фоизга ўсиб, деярли 21,0 триллион сўмни ташкил этди. Шу жумладан тадбиркорлар биржа орқали 13,4 триллион сўмлик товар ресурсларини харид қилган ва 7,5 триллион сўмга тенг ўзлари ишлаб чиқарган товарларни сотган.
Маълумки, 2019 йилда АI-91 автомобиль бензини ва уннинг I-нави бозор қоидалари асосида, талаб ва таклифдан келиб чиққан ҳолда эркин ўрнатила бошлади. Биржа савдолари натижасида шаклланган нархлар ўз навбатида шаффофлик тамойилига риоя қилинган ҳолда мунтазам равишда оммавий ахборот воситалари орқали кенг эълон қилиниб борилди.
Мазкур товарлар учун ҳақиқий бозор нархларининг шаклланиши эса сотувчи корхоналар учун аукцион натижасида олинган қўшимча даромад ҳисобига ўзларининг иқтисодий самарадорлигини ошириш имконини берди.
Шу билан бирга ўтган даврда ўтказилган биржа савдолари ушбу товар бозорларида мутаносиб ҳолатнинг шаклланишига олиб келиб, шаффоф тизимининг барча афзалликларини кўрсатиб берди. Хусусан янги тартиб ўрнатилган пайтдан бошлаб 2019 йил охиргача бўлган даврда АI-91 русумли автомобиль бензини бўйича биржадаги нархи 4,6 фоизга ва I-навли уннинг нархи эса 12 фоизга камайди. Нархларнинг пасайишига савдога қўйилаётган товар ҳажмларининг ўсиши ва улардан эркин фойдаланиш имконияти тақдим этилганлиги кўмак берди.
Изоҳ (0)