15 январь, чоршанба куни оммавий ахборот воситалари учун «ЎзРTХБда биржа савдолари ва электрон тижоратнинг ривожланиш натижалари ва истиқболлари» мавзусида матбуот анжумани бўлиб ўтди. Бу ҳақда ЎзРTХБ матбуот хизмати «Дарё»га хабар берди.
Анжуманда биржанинг 2020 йилда режалаштирилган асосий ишлари ва истиқболли лойиҳаларига ҳам тўхталиб ўтилди.
Биринчи навбатда Ўзбекистон Республикаси Президентининг 2019 йил 8 октябрдаги ПҚ-4484-сон қарорига мувофиқ 2020 йил 1 январидан 38 та юқори ликвидли ва монопол турдаги маҳсулотларни фақат очиқ биржа савдолари орқали сотилиши ва бунда бозор тамойиллари тўла қўлланилиши айтиб ўтилди.
Шунингдек, истиқболда биржанинг ягона клиринг тизимини жорий этилиши кутилмоқда. Яъни эндиликда мижозлар биржа савдолари ва онлайн аукционларида товарни сотиш ёки сотиб олишлари учун биржанинг ҳисоб-китоб клирингдаги битта ҳисобварағидан фойдаланади.
Давлат харидлари бўйича мижозлар учун «SMS-хабарнома» бепул хизмати жорий этилмоқда. Унга кўра, буюртмачилар томонидан жойлаштирилган янги буюртма тўғрисида хабар тадбиркорнинг мобил рақамига келиб тушади.
Навбатдаги лойиҳа кўргазма-ярмарка савдо тизимининг тубдан янгиланишини назарда тутади. Унга кўра, савдо иштирокчилари тузилган битимлар ижросини ҳисоб-китоб клиринги палатаси орқали кафолатлаш механизми афзаликларидан фойдалана оладилар.
Шунингдек, савдолар бўйича электрон ҳисоб-китоблар тизимини жорий этиш, чакана савдо билан шуғулланадиган тадбиркорлар ва жисмоний шахслар учун ҳам алоҳида вебсайтлар яратилиши режалаштирилмоқда.
Изоҳ (0)