«Қишлоқ қурилиш банк» акциядорлик тижорат банкининг устав капиталидаги давлат улуши банкнинг давлат бюджетидаги қарзи ҳисобига 780,5 миллиар сўм миқдорида кўпаяди. Бу ҳақда Корпоратив ахборот ягона порталига таяниб, Капитал бозорини ривожлантириш агентлиги матбуот хизмати хабар берди.
Молия вазирлиги билан банк ўртасида 780 миллиард 477 миллион 399 минг 947 сўмлик шартнома тузилади. Бу ҳақда «Қишлоқ қурилиш банк» АТБ акциядорларининг 7 январь куни ўтказилган навбатдан ташқари умумий йиғилишида қарор қилинган.
«Қишлоқ қурилиш банк» номинал қиймати 119,25 сўм бўлган 6,5 миллиард дона оддий акцияларни чиқаради. Ушбу акциялар ёпиқ обуна йўли билан Молия вазирлигига жойлаштирилади.
Ҳозирги вақтда «Қишлоқ қурилиш банк» устав капитали ҳажми 1,07 триллион cўмга тенг бўлиб, ундаги давлат улуши 96,47 фоизни ташкил етади. Юқорида қайд етилган шартнома натижасида давлат улуши ўсган тақдирда, банкнинг устав капитали ҳажми 78 фоизга ошади.
Эслатиб ўтамиз, бугунги кунда Молия вазирлиги тижорат банкларидаги давлат улуши бўйича акциядор функциясини бажаради. 2019 йил 25 декабрь ҳолатига Ўзбекистондаги умумий банк активларининг 86 фоизи давлат улуши мавжуд банкларга тегишли.
«Акциядорлик жамиятлари ва акциядорларнинг ҳуқуқларини ҳимоя қилиш тўғрисидаги» қонунининг 60-бандига кўра солиққа оид ёки давлат олдидаги бошқа қарздорлик ҳисобига жамият устав фондидаги (устав капиталидаги) давлат улушини шакллантириш ёки ошириш тўғрисидаги қарор жамият акциядорлари умумий йиғилиши томонидан жамиятнинг жойлаштирилган овоз берувчи акцияларининг камида учдан икки қисми эгалари бўлган акциядорларнинг (давлатдан ташқари) розилиги мавжуд бўлган тақдирда, акциядорларнинг оддий кўпчилик овози билан қабул қилинади.
Изоҳ (0)