Африкада 2019 йилнинг энг яхши футболчиси маълум бўлди

Африка футбол конфедерацияси 2019 йилги мавсум якунларига кўра энг яхшиларни тақдирлаш маросимини ўтказди.

Унга кўра, йилнинг энг яхши ёш футболчиси номи Дортмунднинг «Боруссия»сида ижара асосида тўп тепаётган «Реал» вакили, марокашлик Ашраф Ҳакимига насиб этди.

Йил голига аталган совринга эса «Манчестер Сити» ҳамда Жазоир терма жамоаси аъзоси Риёд Маҳрез эга чиқди. Унинг Африка Миллатлар Кубоги мусобақаси ярим финали сўнгги дақиқаларида Нигерия дарвозасига киритган тўпи энг чиройли дея эътироф этилди.

Йил футболчиси соврини «Ливерпуль» ҳамда Сенегал терма жамоаси вингери Садио Манега топширилди. Мане бу йўлда Муҳаммад Салоҳ ҳамда Риёд Маҳрезларни ортда қолдирди.

Йил рамзий терма жамоаси қуйидагича кўриниш олди:

Дарвозабон: Андре Онана («Аякс», Камерун).

Ҳимоячилар: Серж Орье («Тоттенхем», Кот-д’Ивуар), Жоэл Матип («Ливерпуль», Камерун), Калиду Кулибали («Наполи», Сенегал), Ашраф Ҳакими («Боруссия» Дортмунд, Марокаш).

Ярим ҳимоячилар: Идрисса Гуйе (ПСЖ, Сенегал), Риёд Марез («Манчестер Сити», Алжир), Ҳаким Зиёш («Аякс», Марокаш).

Ҳужумчилар: Садио Мане («Ливерпуль», Сенегал), Пьер-Эмерик Обамеянг («Арсенал», Габон), Муҳаммад Салоҳ («Ливерпуль», Миср).