Ўзбекистон мусулмонлари идораси Олий ҳайъатининг навбатдаги кенгайтирилган йиғилиши бўлиб ўтди. Унда Олий ҳайъат аъзолари, диний идора раҳбарияти, бўлим бошлиқлари, таниқли имом-хатиблар иштирок этди. Бу ҳақда ЎМИ матбуот хизмати маълум қилди.
Мажлисда якунига етиб бораётган 2019 йилда Ўзбекистон мусулмонлари идораси томонидан амалга оширилган ишлар сарҳисоб қилинди. Жумладан, масжидлар, диний таълим муассасалари, зиёратгоҳлар ва тизимдаги бошқа ташкилотлар фаолиятининг ютуқ ва камчиликлар муҳокама қилинди. Шунингдек, жорий йилда масжидлар фаолиятини такомиллаштириш борасида амалга оширилган ишлар ва истиқболдаги вазифалар ҳақида сўз юритилди.
Йиғилишда ташкилий масала кўрилди. Унга кўра Ўзбекистон Мусулмонлари идораси тузилмасида янги жорий этилган раиснинг биринчи ўринбосари лавозимига Ҳомиджон Ишматбеков номзоди маъқулланди.
Маълумот ўрнида, Ҳомиджон Ишматбеков 1970 йили Тошкент шаҳрида туғилган. Тошкент ислом институти, Мадина ислом университетида таҳсил олган. Фаолияти давомида «Кўкалдош» ўрта махсус ислом билим юрти мудири, Тошкент шаҳар «Муҳаммад Носир ҳожи» масжиди имом-хатиби, Ўзбекистон Мусулмонлари идораси Фатво бўлими мудири лавозимларида хизмат қилган. Бир қатор китоб ва илмий мақолалар муаллифи.
Изоҳ (0)